At least 91 killed as Gujarat bridge collapses প্ৰধানমন্ত্ৰীৰ গৃহ ৰাজ্য গুজৰাটত সংঘটিত হৈছে শোকাৱহ দুৰ্ঘটনাটো। মেৰামতিৰ পিছত তিনিদিন পূৰ্বে মানুহৰ চলাচলৰ বাবে মুকলি কৰি দিয়া হৈছিল। দেওবাৰে সন্ধিয়া ওলোমা দলংখন মানুহৰ ভিৰৰ হেঁচাত খহি পৰে। ছট পূজাৰ সময়ত বহুলোকে মোৰবীৰ মাচু নদীৰ দলংখনত উঠিছিল। খহি পৰাৰ লগে লগে বহুলোক নদীত পৰি যায়। এতিয়ালৈকে ৯১ জন লোকৰ মৃত্যুৰ খবৰ পোৱা গৈছে। মৃত্যুৰ সংখ্যাটো আৰু বেছি হোৱাৰ সম্ভাৱনা আছে।
প্ৰশাসনেও মৃত্যুৰ সংখ্যা যথেষ্ট বৃদ্ধি পাব পাৰে বুলি আশংকা কৰিছে। কিয়নো কমেও ১৫০ জন লোক সন্ধানহীন হৈ আছে।
দলংখন সাত মাহ ধৰি মেৰামতি কৰা হৈছিল। তাৰ পাছতো প্ৰশাসনে বুজি পোৱা নাই যে কেনেকৈ এখন দলং খহি পৰিল। অৱশ্যে পূজা চাবলৈ যোৱা মানুহৰ কেনেকৈ ৪০০ জন লোক দলংখনত উঠিব পাৰিলে তাক লৈ আৰক্ষীৰ ফালে আঙুলি তুলিছে ৰাজ্যখনৰ সাধাৰণ লোকে।
সূত্ৰ অনুসৰি, দলংখন মেৰামতিৰ বাবে নিবিদা লাভ কৰা কোম্পানীটোৱে আগতে কৈছিল যে দলংখন কমেও ১৫ বছৰৰ বাবে আৰু মেৰামতি কৰিব নালাগিব। কিন্তু প্ৰশ্ন হৈছে যে এইখন পাঁচ দিনতে কেনেকৈ ভাঙি পৰিল। দলংখনত চাৰিশ মানুহ আছিল। নদীখনত খহি পৰাৰ পিছত বহুলোক সন্ধানহীন হৈ আছে। দলংখন ভাঙি পৰা স্থানলৈ উদ্ধাৰকাৰীসকলে নাও লৈ গৈ উদ্ধাৰ অভিযান চলাইছে।
প্ৰধানমন্ত্ৰী নৰেন্দ্ৰ মোদী বৰ্তমান তিনিদিনীয়া গুজৰাট ভ্ৰমণলৈ আহিছে। তেওঁ দুৰ্ঘটনাটোৰ বিষয়ে মুখ্যমন্ত্ৰীৰ সৈতে কথা পাতিছে। তেওঁ সকলো সময়তে উদ্ধাৰ অভিযানৰ ওপৰত নজৰ ৰাখিবলৈ নিৰ্দেশ দিছে।
ইপিনে, দুৰ্ঘটনাত পতিত সকলৰ উদ্ধাৰৰ আটাইতকৈ ডাঙৰ বাধা হৈছিল অন্ধকাৰ। নদীৰ এফালে মাত্ৰ এটা পোহৰ আছে। ফলস্বৰূপে উদ্ধাৰকাৰীসকলে পোহৰৰ ব্যৱস্থা নোহোৱালৈকে উদ্ধাৰ কাৰ্য্যত অত্যাধিক অসুবিধাৰ সন্মুখীন হৈছিল। আশংকা কৰা হৈছে যে দলংখনৰ তলত কমেও ১০০ জন লোক চেপা খাই পৰিছে। ফলত সেই সংখ্যাটোৱে প্ৰশাসনক চিন্তিক কৰিছে। বহুতো লোক পানীত ডুব যোৱাৰ আশংকাত ডুবাৰু মতা হৈছে।
সাধাৰণতে সমগ্ৰ দেশতে নদীৰ পাৰত ছট পূজা উদযাপন কৰা হয়। চাৰিশ মানুহ এখন দলঙত উঠাৰ সময়ত প্ৰশাসনে চকু দিয়া নাছিল! যদি দলংখনত মানুহ কঢ়িয়াই নিয়াৰ সময়ত দুৰ্ঘটনা হয় সেয়া আন এটা কথা, কিন্তু দলংখনত বৃহৎ সংখ্যক লোক উঠি পৰাটো বেলেগ বিষয়। প্ৰশাসন নে দলংখন মেৰামতি কৰা কোম্পানী কাৰ অৱহেলাত ঘটিল এই ট্ৰেজেদি! এই মুহূৰ্তত তাৰে চৰ্চাই চলি আছে।
