“মৃত্যু চিৰন্তন। এই চিৰন্তন সত্যক কোনেও বাধা দিব নোৱাৰে। কিন্তু মানুহে নিজৰ সৃষ্টিশীল কৰ্মযজ্ঞৰ দ্বাৰা মৃত্যু জয় কৰি মৃত্যুঞ্জয়ী হৈ ৰ’ব পাৰে ৷” জাগৃত্ৰি এণ্টাৰটেইনমেণ্টৰ উদ্যাোত শনিবাৰে নগাঁও প্ৰেছ ক্লাৱ প্ৰেক্ষাগৃহত বিশিষ্ট অভিনেতা বিক্ৰম হাজৰিকাৰ প্ৰতি শ্ৰদ্ধাঞ্জলি জ্ঞাপক এক অনুষ্ঠানত কণ্ঠশিল্পী কাকলি শইকীয়াৰ “অ’ বতাহ” শীৰ্ষক শ্ৰব্য গীতটিৰ শুভ উন্মোচনী অনুষ্ঠানত অংশগ্ৰহণ কৰি উল্লেখিত মন্তব্য কৰে প্ৰবীণ শিল্পী তথা স্বনামধন্য তবলাবাদক যজ্ঞ বেজবৰুৱাই।
আধুনিক শ্ৰব্য গীতৰ অনুষ্ঠানটিত “অ’ বতাহ” নামৰ কালজয়ী গীতটোৰ দৃশ্য শ্ৰব্যটি উন্মোচন কৰি অভিনেতা পুত্ৰ বিক্ৰম হাজৰিকাৰ স্মৃতি ৰোমন্থনেৰে মাতৃ তথা একালৰ জনপ্ৰিয় অভিনেত্ৰী প্ৰভা হাজৰিকা আবেগ বিহ্বল হৈ পৰে। পুত্ৰৰ অনুপস্থিতিত হ’লেও পুতেকৰ আশা আজি পূৰণ হোৱা বুলি ব্যক্ত কৰি মাতৃ হাজৰিকাই দুচকু মচি তাৰ সৃষ্টিৰেই এয়া সফল মূল্যায়ন হোৱা বুলি শোকদগ্ধ হৃদয়েৰে প্ৰকাশ কৰে।
বেবেজীয়া পণ্ডিত কনক শৰ্মা উচ্চতৰ মাধ্যমিক বিদ্যালয়ৰ অধ্যক্ষ, বিশিষ্ট গীটাৰবাদক কৃষ্ণ দুলাল বৰুৱাই অনুষ্ঠানত যোগদান কৰি গীতটোত তেওঁ কৰা সুৰৰ বিষয়ে আৰু সংগীত শিল্পী অপূৰ্বজ্যোতি ভূঞাই গীতৰ গীতিকাৰ হিচাপে অনুষ্ঠানত অংশগ্ৰহণ কৰি ক্ৰমে গীতৰ সুৰ আৰু কথা সম্পৰ্কে মনোজ্ঞ বক্তব্য আগবঢ়ায়।
অনুষ্ঠানটিত নগাঁও প্ৰেছ ক্লাৱৰ সভাপতি কনক হাজৰিকা, নগাঁও আনন্দৰাম ঢেকিয়াল ফুকন মহাবিদ্যালয়ৰ জ্যেষ্ঠ অধ্যাপক বিপুল বৰুৱা, নগাঁও ছোৱালী মহাবিদ্যালয়ৰ জ্যেষ্ঠ অধ্যাপিকা ড° স্বপ্না নেওগ, শিল্পী গুণ শইকীয়া, ৰঞ্জন বেজবৰুৱা, প্ৰণতি বৰা, অঞ্জলি মহন্ত, হেলেন পণ্ডিত, সাংবাদিক শৈলেন শইকীয়া, চন্দনজ্যোতি বৰা, শিৱ প্ৰসাদ বৰা প্ৰমুখ্যে ডেৰ কুৰিৰো অধিক লোকৰ সমাবেশ ঘটে।
সামগ্ৰিকভাগে অনুষ্ঠানটিৰ আঁত ধৰে সাংবাদিক প্ৰাঞ্জল বৰদলৈয়ে। শিল্পী কাকলি শইকীয়াই সময়ক সদায় কামেৰে ধৰি ৰাখিবলৈ কৰি অহাৰ ফলশ্ৰুতিতেই তেওঁৰ সৃষ্টি ৰাজিয়ে সজাল ৰূপ ধৰা বুলি অভিমত প্ৰকাশ কৰে।
