T20 World Cup অৱশেষত থমকিল পাকিস্তান। টী-২০ বিশ্বকাপৰ ফাইনেললৈ গ’ল পুনৰুজ্জীৱিত অষ্ট্ৰেলিয়া। দেওবাৰে নিউজিলেণ্ডৰ বিৰুদ্ধে ফাইনেলত অৱতীৰ্ণ হ’ব চিৰ প্ৰতিদ্বন্দ্বী অষ্ট্ৰেলিয়া।
বৃহস্পতিবাৰে মেথিউ ৱেড আৰু ষ্টইনিছে যেন পাকিস্তানৰ পৰা মুখৰ ভাত গৰাহহে কাঢ়ি নিলে। শাহিন আফ্ৰিডীৰ দৰে দুৰ্ধৰ্ষ বলাৰক একেৰাহে তিনিটা ছয় মাৰি মেচ কাঢ়ি নিলে মেথিউ ৱেডে।
মেথিউ ৱেডৰ বিস্ফোৰণৰ বাবেই এক অভাৰ খেল বাকী থাকোতেই অষ্ট্ৰেলিয়াই নিজৰ লক্ষ্য অতিক্ৰম কৰি ৫ উইকেটত বিজয় সাৱ্যস্ত কৰে।
মেথিউ ৱেডে ৪১ আৰু ষ্টইনিছে ৪০ ৰাণত অপৰাজিত হৈ থাকি প্ৰায় অসম্ভৱ যেন লগা মেচখন অষ্ট্ৰেলিয়াৰ হাতলৈ লৈ যায়।
টছত জিকি অষ্ট্ৰেলিয়াৰ অধিনায়ক এৰন ফিঞ্চে প্ৰথমতে পাকিস্তানক বেটিং কৰিবলৈ পঠায়।
পাকিস্তানৰ অধিনায়ক বাবৰ আজম আৰু ৰিজৱান যুটীয়ে প্ৰথম উইকেটত ৭১ ৰাণ কৰে। জাম্পাৰ বলত ৩৯ৰাণত বাবৰে বিদায় লোৱাৰ পাছত ফকৰ জামান আৰু ৰিজৱানে পাকিস্তানৰ ইনিংছ আগবঢ়াই নিয়ে।
Also Read: Covid Update ৰাজ্যত ২৪ ঘন্টাত কিমান আক্ৰান্ত হ’ল কোভিডত, মৃত্যু কিমানৰ?
পাকিস্তানী উইকেটকীপাৰ ৰিজৱানে বিস্ফোৰক ৬৭ ৰাণ কৰি আউট হয়। ৰিজৱান আউট হোৱাৰ সময়ত পাকিস্তানৰ স্ক’ৰ আছিল ১৭.২ অভাৰত ১৪৩ৰাণ।
কিন্তু বাকী বেটাৰকেইজনে আশা কৰা মতে ৰাণ সংগ্ৰহত ব্যৰ্থ হয় আৰু পাকিস্তানে ১৭৬ ৰাণতে ইনিংছ সামৰে। ফকৰ জামানে তিনিটা চাৰি আৰু চাৰিটা ছয়ৰ সহায়ত ৩২টা বলত ৫৫ৰাণ কৰি অপৰাজিত থাকে।
পাকিস্তানৰ দৰে শক্তিশালী বলিঙৰ বিৰুদ্ধে ১৭৬ৰাণৰ লক্ষ্য অৱশ্যে কঠিন বুলিয়েই বিবেচিত হৈছিল। আৰম্ভণিতেই এৰন ফিঞ্চক শূন্য ৰাণতে শাহিন আফ্ৰিডীয়ে আউট কৰি অষ্ট্ৰেলিয়াক আঘাত কৰিছিল।
ইয়াৰ পাছতে অষ্ট্ৰেলিয়াৰ ইনিংছক আগবঢ়াই নিয়াৰ দায়িত্ব লয় ডেভিড ৱাৰ্ণাৰ আৰু মিচেল মাৰ্ছে। শ্বাদাব খানৰ বলত ২৮ ৰাণ কৰি মিচেল মাৰ্ছ আউট হোৱাৰ সময়ত অষ্ট্ৰেলিয়াৰ স্ক’ৰ আছিল ২ উইকেটত ৫২ৰাণ।
Also Read: Students Suicide in India ভাৰতত ২০২০ বৰ্ষত ১২ হাজাৰতকৈয়ো অধিক শিক্ষাৰ্থীয়ে কৰিছে আত্মহত্যা
তাৰ পাছতে ষ্টিভ স্মিথ (৫) আৰু ৱাৰ্ণাৰ(৪৯) লগালগাকৈ আউট হয়। বিস্ফোৰক বেটাৰ মেক্সৱেলো (৭) বেছি সময় টিকিব নোৱাৰিলে। প্ৰায় একেৰাহে উইকেট হেৰুওৱাৰ ফলত অষ্ট্ৰেলিয়াৰ বাবে ৰিকুয়াৰ্ড ৰাণ ৰেট বৃদ্ধি পায়।
কিন্তু উইকেটৰ দুয়োটা মূৰত ষ্টইনিছ আৰু ৱেড অবিচল ৰূপত বেটিং কৰি থাকি সুযোগৰ অপেক্ষাত ৰয়।
শাহিন আফ্ৰিডীৰ ১৯তম অভাৰত বিধ্বংসী ৰূপ লয় মেথিউ ৱেডে। একেৰাহে তিনিটাকৈ ছয় মাৰি পাকিস্তানৰ স্বপ্নভংগ কৰাই নহয়, অষ্ট্ৰেলিয়াক ফাইনেলত প্ৰৱেশৰ বাটো প্ৰশস্ত কৰে ৱেডে।
