হাজাৰ হাজাৰ লোক ওলাই আহিল নাৰীৰ প্ৰতি যৌন নিৰ্যাতনৰ প্ৰতিবাদত।
অষ্ট্ৰেলিয়াৰ সংসদত ঘটি যোৱা দুটাকৈ যৌন নিৰ্যাতনৰ প্ৰতিবাদত দেশখন বৰ্তমান উত্তাল হৈ পৰিছে।
যৌন নিৰ্যাতনৰ দাবীত অষ্ট্ৰেলিয়াৰ শাসনাধীস্থ সোপন্থী তথা ৰক্ষণশীল চৰকাৰৰ মন্ত্ৰীসভাখনৰ সদস্যসকলক তদন্ত কৰাৰ দাবীত এই প্ৰতিবাদ আৰম্ভ হৈছে।
প্ৰতিবাদ আৰম্ভ হৈছিল এসপ্তাহ পূৰ্বেই।
দেশখনৰ এগৰাকী মন্ত্ৰী তথা এটৰ্ণী জেনেৰেল খ্ৰীষ্টিয়ান পৰ্টাৰে প্ৰকাশ কৰিছিল ১৯৮৮ চনৰ এটা যৌন নিৰ্যানতনৰ অভিযোগত তেওঁৱো অভিযুক্ত আছিল- যিটো তেওঁ নস্যাৎ কৰে।
তদুপৰি, আন এটা যৌন নিৰ্যাতনৰ অভিযোগে ফেব্ৰুৱাৰীত তোলপাৰ লগায়।
ব্ৰিট্টানী হিগ্গিনছ নামৰ এগৰাকী প্ৰাক্তন ৰাজনৈতিক উপদেষ্টাই ১৫ ফেব্ৰুৱাৰীত অভিযোগ কৰে যে ২০১৯ চনত এজন মন্ত্ৰীৰ কাৰ্যালয়ত এজন সহকৰ্মীৰ ধৰ্ষিতা হৈছিল।
ইয়াৰ পাছতে অষ্ট্ৰেলিয়াত যৌন নিৰ্যাতনৰ অভিযোগৰ জোৱাৰ উঠে।
বহুতো ভুক্তভোগীয়ে স্কুল, অফিচ আৰু অন্যান্য ক্ষেত্ৰত সমুখীন হোৱা যৌন নিৰ্যাতনৰ অভিজ্ঞতাসমূহ ৰাজহুৱা কৰে।
প্ৰতিবাদকাৰীসকলে কৈছে যে যৌন নিৰ্যাতনৰ অভিযোগসমূহ শাসনাধিস্থ চৰকাৰখনে উলাই কৰি আহিছে।
সোমবাৰে ৰাজধানী কেনবেৰাস্থিত সংসদ ভৱনৰ সমুখত প্ৰতিবাদী কাৰ্যসূচী পালন কৰা হয়।
হাজাৰ হাজাৰ প্ৰতিবাদকাৰীৰ সমুখত ব্ৰিট্টানী হিগ্গিনছে কয়- ”অষ্ট্ৰেলিয়াত নাৰীসকলে যৌন নিৰ্যাতনৰ সামাজিক স্বীকৃতিপ বলি হৈ আহিছে।”
”যদিহে এয়া সংসদ ভৱনত হ’ব পাৰে, তেন্তে সঁচাকৈয়ে ই য’তে-ত’তে হ’ব পাৰে।”- নিজৰ দুৰ্ভাগ্যজনক অভিজ্ঞতা সম্পৰ্কে হিগ্গিনছে কয়।
সোমবাৰে চিডনী, কেনবেৰা, মেলব’ৰ্ণকে ধৰি দেশখনৰ ৪০খন চহৰত ‘মাৰ্চ ফৰ জাষ্টিছ’ শীৰ্ষক প্ৰতিবাদী সমদল পালন কৰা হয়।
প্ৰতিবাদকাৰীসকলে কৈছে যে ই অষ্ট্ৰেলিয়াৰ ইতিহাসত নাৰী অধিকাৰৰ ক্ষেত্ৰত আটাইতকৈ বৃহৎ আন্দোলন।
মুখত ক’লা কাপোৰ পিন্ধি প্ৰতিবাদকাৰীসকলে বেনাৰ-পোষ্টাৰ প্ৰদৰ্শন কৰে।
দেশখনৰ প্ৰধানমন্ত্ৰী স্কট মৰিছন আৰু শাসনাধীস্থ লিবাৰেল পাৰ্টিৰ সদস্যসকলে প্ৰতিবাদকাৰীসকলে প্ৰতিবাদস্থলীত সাক্ষাৎ কৰিবলৈ অমান্তি হয়।
আনহাতে, বিৰোধী দল লেবাৰ পাৰ্টিৰ সদস্যসকলে প্ৰতিবাদত যোগদান কৰি শাসনাধীস্থ চৰকাৰখনক সমালোচনা কৰে।
বিৰোধী দলটোৱে শাসনাধিস্থ দলৰ সদস্যসকলৰ ওপৰত উঠা যৌন অভিযোগৰ ঘটনাসমূহৰ তদন্তৰ দাবী কৰে।
উল্লেখযোগ্য এই প্ৰতিবাদত বয়স নিৰ্বশেষে নাৰীসকলে যোগদান কৰিছে।
