আৱেগৰ বিস্ফোৰণ নহয়। নিৰৱে পৰাজিত নায়কৰ দৰে এদিনীয়া ক্ৰিকেটৰ পৰা অৱসৰ ল’লে ষ্টীভ স্মিথে। তেওঁ আৰু অষ্ট্ৰেলিয়াৰ হৈ এদিনীয়াত নেখেলে। চেম্পিয়নছ ট্ৰফীৰ ছেমি ফাইনেলত ভাৰতৰ হাতত পৰাস্ত হোৱাৰ পিছতে স্মিথে এই কথা ঘোষণা কৰে। অষ্ট্ৰেলিয়াৰ অধিনায়কগৰাকীৰ অৱসৰৰ ফলত এদিনীয়া ক্ৰিকেটৰ তথাকথিত ফেব ফোৰ ভাঙি গ’ল।
মঙলবাৰে ছেমি ফাইনেলত ভাৰতৰ হাতত পৰাস্ত হোৱাৰ পাছত ড্ৰেছিং ৰুমত এদিনীয়া খেলৰ পৰা অৱসৰ লোৱাৰ কথা ঘোষণা কৰে স্মিথে। ক্ৰিকেট অষ্ট্ৰেলিয়াই বুধবাৰে এক চমু বিবৃতিযোগে আনুষ্ঠানিকভাৱে এই কথা ঘোষণা কৰে।
২০১০ চনত ৱেষ্ট ইণ্ডিজৰ বিৰুদ্ধে স্মিথj অভিষেক ঘটিছিল। তেওঁ নিজৰ কেৰিয়াৰ আৰম্ভ কৰিছিল লেগ স্পিনিং অল ৰাউণ্ডাৰ হিচাপে। ক্ৰমান্বয়ে তেওঁ বিশ্ব ক্ৰিকেটত শীৰ্ষ তাৰকা হিচাপে নিজকে প্ৰতিষ্ঠা কৰিছিল।
স্মিথে অষ্ট্ৰেলিয়াৰ হৈ ১৭০খন এদিনীয়া মেচত ৫৮০০ ৰান সংগ্ৰহ কৰিছে। তেওঁ ১২টা শতক আৰু ৩৫টা অৰ্ধশতকৰ গৰাকী। এদিনীয়া মেচত তেওঁৰ গড় ৪৩.২৮। ইয়াৰ উপৰিও ২৮টা উইকেটো আছে।
স্মিথ অষ্ট্ৰেলিয়াৰ অন্যতম বৰ্ণাঢ্য ক্ৰিকেটাৰ। এটা সময়ত ক্ৰিকেট বিশেষজ্ঞসকলে স্মিথক বিৰাট কোহলী, জো ৰুট, কেন উইলিয়ামছনৰ সৈতে স্থান দিছিল। আচৰিত ধৰণেৰে তেওঁ নিজৰ কেৰিয়াৰ আৰম্ভ কৰিছিল। অৱশ্যে ক্ৰমান্বয়ে গতি হেৰুৱাবলৈ আৰম্ভ কৰে।
যদিও অৱসৰৰ সময়ত এদিনীয়া ক্ৰিকেটত পৰিসংখ্যাৰ ক্ষেত্ৰত সমসাময়িক মহাতাৰকাৰ পৰা কিছু পিছ পৰি আছিল, তথাপিও ট্ৰফী জয়ৰ ক্ষেত্ৰত তেওঁ সফলতাৰ শিখৰত উপনীত হৈছিল। অষ্ট্ৰেলিয়াৰ হৈ ২০১৫ আৰু ২০২৩ চনৰ বিশ্বকাপত জয়লাভ কৰিছে স্মিথে। দীৰ্ঘদিন ধৰি দলটোক নেতৃত্বও দিছিল। বৰ্তমানৰ চেম্পিয়নছ ট্ৰফীতো অষ্ট্ৰেলিয়াৰ সৰ্বাধিক ৰান সংগ্ৰহকাৰী আছিল স্মিথ। কিন্তু দলক সফলতা আনি দিব নোৱাৰি নিৰবে অৱসৰ ল’লে।
স্মিথৰ এদিনীয়াৰ পৰা অৱসৰৰ ফলত বিশ্ব ক্ৰিকেটৰ ফেব ফোৰ ভাঙি গৈছে। এদিনীয়া ফৰ্মেটত ১৯ বছৰ অনুৰ্ধৰ খেলৰ সময়ৰে পৰা কোহলী আৰু স্মিথৰ মাজত আৰম্ভ হোৱা প্ৰতিদ্বন্দ্বিতাৰ প্ৰথম ৰাউণ্ডত শেষ হ’ল। অৱশ্যে অনাগত দিনতো স্মিথক টেষ্ট আৰু টি-২০ত খেলা দেখা যাব।
