অষ্ট্ৰিয়াৰ এখন বিদ্যালয়ত সংঘটিত হয় গুলীচালনা। ইটোৰ পিছত সিটোকৈ মাটিত ধলিপৰে ছাত্ৰ-ছাত্ৰী। এই ঘটনাত কমেও ৯ জন লোকৰ মৃত্যু হয়। অৱশেষত অভিযুক্তজনেও নিজকে গুলীয়াই হত্যা কৰে। এই ঘটনাত কেইবাজনো লোক আহত হয়। অৱশ্যে এই সংখ্যা এতিয়াও স্পষ্ট হোৱা নাই। অষ্ট্ৰিয়াৰ গ্ৰাজ চহৰৰ এখন বিদ্যালয়ত সংঘটিত হৈছে এই ঘটনা। মধ্য ইউৰোপৰ দেশসমূহত গুলীচালনা বিৰল। এই ঘটনাত স্তম্ভিত হৈ পৰিছে অষ্ট্ৰিয়াৰ প্ৰশাসন।
অষ্ট্ৰিয়াৰ স্বৰাজ মন্ত্ৰীয়ে সংবাদ মাধ্যমৰ আগত বিদ্যালয়ত গুলীচালনাৰ বিষয়ে জনায়। তেওঁ কয় যে অভিযুক্তকে ধৰি আটাইকেইজন ভুক্তভোগীৰ বয়স ১৪ৰ পৰা ১৮ বছৰৰ ভিতৰত। আৰক্ষীয়ে জনোৱা মতে, মঙলবাৰে (অষ্ট্ৰিয়াৰ স্থানীয় সময় অনুসৰি) পুৱা প্ৰায় ১০ বজাত বিদ্যালয়খনত বন্দুকৰ গুলীৰ শব্দ শুনা গৈছে। লগে লগে ঘটনাস্থলীত আৰক্ষী উপস্থিত হয়। হেলিকপ্টাৰে আকাশত টহল দিবলৈ আৰম্ভ কৰিলে। আৰক্ষীয়ে ছাত্ৰ-ছাত্ৰীক বিদ্যালয়ৰ পৰা সুৰক্ষিত ভাবে উলিয়াই অনাৰ লগতে অঞ্চলটো ঘেৰাও কৰি ৰখা হয়।
অষ্ট্ৰিয়াৰ চ্যান্সেলৰ খ্ৰীষ্টিয়ান ষ্টকাৰে এক্সত পোষ্ট কৰি শোক প্ৰকাশ কৰে। তেওঁ লিখিছে, ” বিদ্যালয়ত সংঘটিত এই ঘটনাটো দেশখনৰ বাবে এক দুখৰ বিষয়।এই ঘটনাই সমগ্ৰ দেশক জোকাৰি গৈছে। এই অবিশ্বাস্য ঘটনাত কেইবাজনো কিশোৰে প্ৰাণ হেৰুৱাইছে বুলি উল্লেখ কৰে।
উল্লেখ্য যে অষ্ট্ৰিয়াকে ধৰি মধ্য ইউৰোপৰ দেশসমূহত গুলীচালনাৰ ঘটনা বিৰল। পৰিসংখ্যা অনুসৰি ২০২১ চনত সেই দেশৰ প্ৰতি এক লাখ নাগৰিকৰ ভিতৰত ০.১ জন লোক বন্দুকৰ গুলীত নিহত হৈছিল। আনহাতে আমেৰিকাত সেই বছৰ প্ৰতি এক লাখ লোকৰ ভিতৰত ৪.৬ জন লোকে বন্দুকৰ গুলীত নিহত হৈছিল। অষ্ট্ৰিয়াত যোৱা কিছু বছৰত হিংসাৰ কেইটামান ঘটনা সংঘটিত হৈছে যদিও সংখ্যাত কম। যোৱা বছৰৰ অক্টোবৰ মাহত অষ্ট্ৰিয়াৰ এখন চহৰৰ মেয়ৰক গুলীয়াই হত্যা কৰা হৈছিল। ফেব্ৰুৱাৰী মাহত দক্ষিণ অষ্ট্ৰিয়াৰ এখন চহৰত এজন যুৱকে পাঁচজন পথচাৰীক প্ৰহাৰ কৰাৰ অভিযোগ উত্থাপন হৈছিল।
