ৰাষ্ট্ৰীয় পোষণ অভিযানৰ অংশ হিচাপে মাজুলী জিলাতো যোৱা ১ চেপ্টেম্বৰৰ পৰা অহা ৩০ চেপ্টেম্বৰলৈ পোষণ মাহ-২০১৯ পালন কৰা হৈছে।
মাজুলী জিলা প্ৰশাসনৰ তত্বাৱধানত জিলা সমাজ কল্যাণ বিভাগে ৰূপায়ণ কৰা এই পোষণ মাহৰ সৈতে সংগতি ৰাখি শুকুৰবাৰে নামনি মাজুলীত এক সজাগতামূলক চাইকেল ৰেলী উলিওৱা হয়।
পৰিপুষ্টি, স্বচ্ছতা আৰু স্বাস্থ্যসন্মত খাদ্যাভাস সম্পৰ্কে জনসজাগতা সৃষ্টিৰ লক্ষ্যৰে শুকুৰবাৰে ৰাতিপুৱা ৯ বজাত নামনি মাজুলী ছিনিয়ৰ হায়াৰ ছেকেণ্ডাৰী স্কুলৰ পৰা ছাত্ৰ-ছাত্ৰীৰ সহযোগত চাইকেল ৰেলী উলিয়ায় জিলা সমাজকল্যাণ বিভাগে।
শিক্ষানুষ্ঠানখনৰ ৫০গৰাকী ছাত্ৰীয়ে অংশগ্ৰহণ কৰা এই চাইকেল ৰেলী পতাকা জোকাৰি আনুষ্ঠানিক ভাৱে শুভৰাম্ভ কৰে মাজুলীৰ উপায়ুক্ত দেৱপ্ৰসাদ মিশ্ৰয়।
সজাগতা ৰেলীত অংশগ্ৰহণকাৰী ছাত্ৰীসকলে নিজৰ নিজৰ চাইকেলত পৰিপুষ্টি, স্বচ্ছতা, স্বাস্থ্যসন্মত খাদ্যভ্যাস আদিৰ বিষয়ে তথ্য সম্বলিত আকৰ্ষণীয় প্লেকাৰ্ড লগাই লৈ অঞ্চলটোত ৰাষ্ট্ৰীয় পোষণ অভিযানৰ লক্ষ্য-উদ্দেশ্যৰ বিষয়ে প্ৰচাৰ চলায়।
অতিৰিক্ত উপায়ুক্ত উৎপল দলে, সংলগ্ন ৰাজহ চক্ৰ বিষয়া ডাঃ অনামিকা গগৈ, জিলা সমাজ কল্যাণ বিষয়া নিৰদা দেউৰী, জনস্বাস্থ্য কাৰিকৰী বিভাগৰ সহকাৰী কাৰ্যবাহী অভিযন্তা প্ৰবীণ কুমাৰ সন্দিকৈ আৰু নামনি মাজুলী ছিনিয়ৰ ছেকেণ্ডাৰী স্কুলৰ অধ্যক্ষ কুশল হাজৰিকাৰ লগতে শিক্ষানুষ্ঠানখনৰ শিক্ষক-শিক্ষয়িত্ৰীসকল আৰু ছাত্ৰ-ছাত্ৰী তথা বহুসংখ্যক স্থানীয় লোকে চাইকেল ৰেলীৰ উদ্বোধনী অনুষ্ঠানৰ লগতে সামৰণিত আয়োজিত সজাগতামূলক সভাত অংশগ্ৰহণ কৰে।
