এক্সিয়াম-৪ অভিযানৰ উৎক্ষেপণ বুধবাৰে পুনৰ, পঞ্চমবাৰৰ বাবে, স্থগিত ৰখা হৈছে। স্পেচএক্সৰ ফেলকন ৯ ৰকেটৰ কাৰিকৰী অসুবিধাৰ বাবে এই সিদ্ধান্ত লোৱা হৈছে বুলি সদৰী কৰিছে।
স্পেচএক্সে প্ৰকাশ কৰা এক বিবৃতিত কয় @Space_Station লৈ কাইলৈ হ’ব লগা ফেলকন ৯ উৎক্ষেপণ পিছুৱাই দিয়া হৈছে, যাতে ষ্টেটিক ফায়াৰ পৰীক্ষাৰ পাছত বুস্টাৰত চিনাক্ত কৰা LOx (লিকুইড অক্সিজেন) লিক মেৰামতি কৰিবলৈ দলসমূহক অধিক সময় দিয়া যায়।
গ্ৰুপ কেপ্তেইন শুক্লা হ’ব ব্যক্তিগত মহাকাশচাৰী অভিযানৰ অধীনত আই এছ এছ ভ্ৰমণ কৰা প্ৰথমজন ভাৰতীয়। এই অভিযান নাছা (NASA) আৰু ইছৰ’ (ISRO)-ৰ যৌথ সহযোগিতাত চলি আছে।
ইছৰ’ৰ অধ্যক্ষ ডঃ ভি. নাৰায়ণনে স্পষ্ট কৰই দিয়ে যে ফেলকন ৯ ৰকেটৰ বুস্টাৰ ষ্টেজৰ কাৰ্যক্ষমতা নিশ্চিত কৰিবলৈ লঞ্চ পেডত ৭ ছেকণ্ডৰ পৰীক্ষা চলোৱা হৈছিল, য’ত প্ৰপালচন বে’ত LOx লিক ধৰা পৰে। এই লিকটো মেৰামতিৰ সিদ্ধান্ত লোৱা হৈছে আৰু উৎক্ষেপণৰ পূৰ্বে সকলো প্ৰয়োজনীয় বৈধকৰণ পৰীক্ষা সম্পন্ন কৰা হ’ব বুলি জাননী দিয়া হৈছে।
এই অভিযান পূৰ্বে প্ৰতিকূল বতৰৰ বাবে ৮ জুনৰ পৰা ১০ জুনলৈ পিছুৱাই দিয়া হৈছিল। মঙলবাৰে অভিযান আৰম্ভ হোৱাৰ কথা আছিল, কিন্তু বেয়া বতৰৰ বাবে সেই দিনাও স্থগিত ৰখা হয়। বৰ্তমান নতুন উৎক্ষেপণৰ তাৰিখ নিৰ্ধাৰণ হোৱা নাই।
