অতি সংগোপনে দেশৰ ৪৯ খন তৈলক্ষেত্রৰ লগতে অসমৰ ৮ খন তৈল ক্ষেত্র ব্যক্তিগত প্রতিষ্ঠানক গতাই দিয়াৰ বিৰোধ কৰিছে অসম জাতীয়বাদী যুৱ-ছাত্ৰ পৰিষদে।
কেন্দ্রীয় চৰকাৰৰ পেট্রলিয়াম মন্ত্রালয়াৰ বিৰুদ্ধে আৰু অসম শক্তি বিতৰণ কর্প’ৰেচন চমুকৈ এ পি ডি চি এলক ব্যক্তিগতকৰণৰ বাবে গ্ৰহণ কৰা সিদ্ধান্তকো তীব্ৰ বিৰোধিতা কৰিছে পৰিষদে।
ৰাজ্যৰ কেইবাখনো জিলাত ইতিমধ্যে উপায়ুক্তৰ কাষ চাপিছে অসম জাতীয়তাবাদী যুৱ-ছাত্ৰ পৰিষদ।
সমগ্ৰ দেশত ভয়ংকৰ মহামাৰী ক’ৰ’নাৰ আতংক আৰু এই ল’কডাউনৰ সংকট থকাৰ সময়ত সুযোগ গ্রহণ কৰি কেন্দ্ৰৰ নৰেন্দ্ৰ মোডী চৰকাৰখনে দেশৰ ৰাজহুৱা খণ্ডৰ উদ্যোগ প্রতিষ্ঠানসমূহ ব্যক্তিগত কোম্পানীক বিক্ৰী কৰি দেশৰ ৰাজহুৱা সম্পদ নিঃশেষ কৰাৰ ব্যপক হাৰত অভিযোগ উত্থাপন হৈছে চৰকাৰৰ বিৰুদ্ধে।
আনহাতে আমাজন খ্যাত দিহিং পাটকাই অভয়াৰণ্যখনত কয়লাৰ মুক্ত খননৰ বাবে ব্যক্তিগত কোম্পানীক ইতিমধ্যে অনুমোদন প্ৰদান কৰিছে কেন্দ্ৰীয় চৰকাৰে।
চৰকাৰৰ এনে সিদ্ধান্তত জাঙুৰ খাই উঠিছে অসম জাতীয়তাবাদী যুৱ-ছাত্ৰ পৰিষদৰ লগতে সমগ্ৰ সচেতন মহল।
এই সন্দৰ্ভত ইতিমধ্যে ৰাজ্যৰ কেইবাখনো জিলাৰ লগেত বিশ্বনাথতো অসম জাতীয়তাবাদী যুৱ ছাত্ৰ পৰিষদৰ বিশ্বনাথ জিলা সমিতিয়ে বিশ্বনাথ জিলা উপায়ুক্তক সাক্ষাৎ কৰি উল্লেখিত সমস্যাসমুহ সম্বলিত স্মাৰক পত্ৰ প্ৰদান কৰে সংগঠনটোৰ বিষয়ববীয়াসকলে।
বিশ্বনাথ জিলা উপায়ুক্তৰ জৰিয়তে প্ৰধানমন্ত্ৰীলৈ প্ৰেৰণ কৰা এই স্মাৰক পত্ৰত চৰকাৰৰ এনে সিন্ধান্ত অতি শীঘ্ৰে বাতিল কৰাৰ বাবে দাবী জনাই আগন্তুক দিনলৈকে যদি চৰকাৰে এনে সিদ্ধান্ত বাতিল নকৰে তেতিয়ালৈকে প্ৰতিবাদ সাবস্ত্য কৰি যাব বুলি স্মাৰকপত্ৰত উল্লেখ কৰে পৰিষদে।
