অযোধ্যাত গৰুক পিন্ধোৱা হ’ব কোট; দুই এদিনতে পাবহি প্ৰথম অৰ্ডাৰৰ ডেলিভাৰী
ঐতিহাসিক অযোধ্যা গোচৰৰ ৰায়দানৰ পিছতে এতিয়া ‘পবিত্ৰ’ নগৰখনৰ বিভিন্ন গোশালাত থকা গৰুসমূহক কোটচোলা পিন্ধোৱাৰ সিদ্ধান্ত লৈছে অযোধ্যা পৌৰনিগমে।
উক্ত কোটসমূহ মৰাপাটৰে তৈয়াৰ কৰা হ’ব বুলি অযোধ্যা নগৰ নিগমৰ অধ্যক্ষ নিৰজ শুক্লাই জনায়।
এই সম্পৰ্কত তেওঁ কয়, ‘আমি গৰুৰ বাবে কোট বনোৱাৰ কামত লাগি আছো। তিনি-চাৰিটা পৰ্য্যায়ত এই আঁচনি কাৰ্য্যকৰী কৰা হ’ব। প্ৰথমে আনি বৈসিংপুৰ গোশালাৰ পৰা আৰম্ভ কৰিম, য’ত প্ৰায় ১২০০ গৰু-ম’হ আছে, ইয়াৰে ৭০০টা বলধ আৰু বাকি সমূহ গাই আৰু গৰু পোৱালি।‘
‘আৰম্ভণিতে আমি গৰু পোৱালিসমূহৰ বাবে ১০০টা কোটচোলাৰ অৰ্ডাৰ দিছো’ বুলি উল্লেখ কৰি শুক্লাই জনাই যে নৱেম্বৰৰ শেষৰফালে প্ৰথমটো ডেলিভাৰী আহি পাব।
এটা কোটৰ দাম ২৫০ৰ পৰা ৩০০ টকা হ’ব বুলিও তেওঁ লগতে জনায়।
তেওঁ আৰু কয়, ‘গৰু পোৱালি বিলাকৰ বাবে তিনিটা তৰপৰ কোট বনোৱা হৈছে। ভিতৰৰ তৰপটোত আমি মৰাপাটৰ উপৰি কোমল কাপোৰ দিবলৈ কৈছো যাতে ভালদৰে উম পায়।‘
আনহাতে বলধ আৰু গাই গৰু বিলাকৰ ক্ষেত্ৰত কোটৰ ডিজাইন পৃথক হ’ব বুলি জানিবলৈ দি তেওঁ কয় যে বলধৰ বাবে বনোৱা কোটত কেৱল মৰাপাট থকাৰ বিপৰীতে গাই বিলাকৰ বাবে বনোৱা কোটত দুটা তৰপ থাকিব।
‘গাই বিলাকৰ বাবে বনোৱা কোটসমূহ আমি চিলাই দিয়াৰ কথা ভাবিছো যাতে সেইবিলাক সৰি নপৰে।‘ তেওঁ লগতে জনায়।
পৌৰপতি ঋষিকেশ উপাধ্যায়ে কয়, ‘গৰুৰ সেৱা কৰাত আমি মনোনিৱেশ কৰিছো। আমি আন গোশালাসমূহো উন্নীত কৰি আছো আৰু সেইবিলাকক দেশৰ ভিতৰতে শ্ৰেষ্ঠ বনাম।‘