সাম্প্ৰতিক ক্ৰিকেট বিশ্বত নিজৰ চমকপ্ৰদ প্ৰদৰ্শনেৰে অন্যতম শ্ৰেষ্ঠ বেটাৰ হিচাপে খ্যাতি অৰ্জন কৰা পাকিস্তানৰ অধিনায়ক বাবৰ আজমে অব্যাহত ৰাখিছে অবিশ্বাস্য ছন্দ। আন্তৰ্জাতিক ক্ৰিকেটত ক্ৰমাগতভাৱে বেটিং বিক্ৰম প্ৰদৰ্শন কৰি অহা বাবৰে বুধবাৰে ৱেষ্ট ইণ্ডিজৰ বিৰুদ্ধে প্ৰথম খন এদিনীয়াত শতকীয় ইনিংছেৰে পাকিস্তানৰ জয় নিশ্চিত কৰাৰ লগতে দুটাকৈ নতুন অভিলেখ স্থাপন কৰিছে।
বুধবাৰৰ এই শতকীয় ইনিংছটোৰে পাকিস্তানৰ অধিনায়ক হিচাপে দায়িত্ব লোৱাৰ পিছত বাবৰে এদিনীয়াত ১০০০ ৰান সম্পূৰ্ণ কৰে। মাত্ৰ ১৩ টা ইনিংছতে এই কৃতিত্ব অৰ্জন কৰি বাবৰে এক ঈৰ্ষণীয় ৰেকৰ্ড নিজৰ নামত সন্নিৱিষ্ট কৰে।
অধিনায়ক হিচাপে দ্ৰুততম ১,০০০ ৰান সংগ্ৰহৰ তালিকাত বাবৰে অতিক্ৰম কৰে ভাৰতৰ প্ৰাক্তন অধিনায়ক তথা তাৰকা ক্ৰিকেটাৰ বিৰাট কোহলীক।
বাবৰে অধিনায়ক হিচাপে মাত্ৰ ১৩ টা ইনিংছতে ১,০০০ ৰানৰ সংখ্যা স্পৰ্শ কৰাৰ বিপৰীতে বিৰাটে ১৭ টা ইনিংছত এই কৃতিত্ব অৰ্জন কৰিছিল। আনহাতে এই তালিকাত কোহলীৰ পিছতে আছিল দক্ষিণ আফ্ৰিকাৰ প্ৰাক্তন অধিনায়ক এবি ডি ভিলিয়াৰ্ছ।
ভিলিয়াৰ্ছে অধিনায়ক হিচাপে দায়িত্ব লোৱাৰ পিছত ১৮ টা ইনিংছত ১,০০০ ৰান সংগ্ৰহ কৰিছিল। এইক্ষেত্ৰত কেন উইলিয়ামছনে ২০ টা ইনিংছত আৰু এলিয়েষ্টাৰ কুকে ২১ টা ইনিংছত এই সফলতা অৰ্জন কৰিছিল।
বুধবাৰৰ খেলখন আৰম্ভ হোৱাৰ পূৰ্বে কোহলীক অতিক্ৰমৰ বাবে বাবৰ আজমক ৯৮ ৰাণৰ প্ৰয়োজন আছিল আৰু ধাৰাবাহিক প্ৰদৰ্শনৰ ধাৰা অক্ষুণ্ণ ৰাখি শতকীয় ইনিংছেৰে বাবৰে এই অভিলেখ গঢ়ি তোলে।
বাবৰে লগতে এই শতকীয় ইনিংছটোৰে আন এক অভিলেখো স্থাপন কৰে। এইয়া আছিল এদিনীয়াত বাবৰৰ ক্ৰমাগত তৃতীয়টো শতক। এইদৰে এদিনীয়া ক্ৰিকেটৰ ইতিহাসত দুবাৰকৈ ক্ৰমাগতভাৱে তিনিটা শতক অৰ্জন কৰা প্ৰথম ক্ৰিকেটাৰ হিচাপেও চিহ্নিত হয় বাবৰ।
সম্প্ৰতি বাবৰে আন্তঃৰাষ্ট্ৰীয় ক্ৰিকেটত এগৰাকী শ্ৰেষ্ঠ বেটাৰ ৰূপে নিজকে প্ৰতিষ্ঠিত কৰিছে। ধাৰাবাহিকভাৱে আগবঢ়াই অহা উন্নত প্ৰদৰ্শনৰ সুবাদত ভাবৰে এদিনীয়া আৰু টি-২০ ফৰ্মেটত বিশ্বৰ শীৰ্ষস্থানৰ বেটাৰ হিচাপে পৰিগণিত হৈছে। আনহাতে টেষ্ট ক্ৰিকেটতো বেটাৰৰ ৰেংকিঙত চতুৰ্থ স্থানত আছে বাবৰ।
