বোকাখাতৰ চন্দ্ৰমা নামৰ পৰিত্যক্ত চিনেমা হলটোত স্থানীয় এদল যুৱকে গঢ়ি তোলা বেদমিণ্টন প্ৰশিক্ষণ কেন্দ্ৰ্টোক লৈ পৰিৱেশিত বাতৰি সন্দৰ্ভত সাংবাদিকৰে মাজতে ঘটিছে মতানৈক্য।
প্ৰশিক্ষণ কেন্দ্ৰটোৱে বিদ্যুৎ চুৰি কৰা আৰু এই কাম মহকুমা আৰক্ষী বিষয়াজনৰ সহযোগিতাত হোৱা বুলি এখন অসমীয়া বাতৰি কাকতে পৰিৱেশন কৰা ‘ভিত্তিহীন’ বাতৰিক লৈ এই ঘটনাৰ সূত্ৰপাত হৈছে।
কাজিৰঙাৰ এজন সাংবাদিকে পৰিৱেশন কৰা এই বাতৰিটো ‘ভিত্তিহীন আৰু উদ্দেশ্যপ্ৰণোদিত’ বুলি অভিহিত কৰি শনিবাৰে বোকাখাতত বেদমিণ্টন কেন্দ্ৰটো পৰিচালনাকাৰী স্থানীয় সংগঠন ৩টাই এক সংবাদমেলত উপস্থিত স্থানীয় সমূহ সাংবাদিকে বাতৰিটোক ‘গৰিহণা’ দিয়ে।
সংবাদমেলখনত বোকাখাতৰ মহকুমা সাংবাদিক সন্থা, বোকাখাত প্ৰে’ছ ক্লাব আৰু ইলেক্ট্ৰনিক মীডিয়া জাৰ্নেলিষ্ট এচচিয়েচনৰ সকলো সাংবাদিক উপস্থিত আছিল।
বোকাখাতৰ চন্দ্ৰমা, জাগৃতি আৰু বোকাখাত টাউন ক্লাব নামৰ তিনিটা সংগঠনে পৰিত্যক্ত চিনেমা হলটোত বেদমিণ্টন প্ৰশিক্ষণ কেন্দ্ৰৰূপে গঢ়ি তুলিছে। সংগঠনকেইটাই শনিবাৰৰ সংবাদমেলত কয় যে ‘ইন্দ’ৰ খেলৰ সুবিধা নথকা বোকাখাত’ত তেওঁলোকে মুকলি কৰা কেন্দ্ৰটোৰ বাবে নিয়মীয়াকৈ বিদ্যুৎ মাচুল আদায় দি থকা হৈছে।
‘বোকাখাতত ইনড’ৰ খেলৰ সুবিধা নথকাৰ বাবে অতি কষ্টৰে আমি পৰিত্যক্ত চিনেমা হলটোত গাঁঠিৰ ধন ভাঙি বেডমিন্টন খেলৰ উপযোগী কৰি তুলিছো৷ খেলৰ বাবে কাষৰ দুঘৰ মানুহৰ পৰা বিদ্যুৎ সংযোগ কৰি ব্যৱহাৰ কৰা বিদ্যুতৰ বাবে নিয়মিত পইচা দি আহিছো,’ সংবাদমেলত স্পষ্টীকৰণ সংগঠনকেইটাৰ৷
আনহাতে কেন্দ্ৰটোৰ সৈতে ‘মহকুমা আৰক্ষী বিষয়াজনৰ নাম সাঙুৰি বাতৰি পৰিৱেশন কৰা’তো ‘ক্ষোভ প্ৰকাশ কৰিছে’ সংগঠনকেইটাই৷
সংবাদমেলত সংগঠনকেইটাৰ কৰ্মকৰ্তাৰ উপৰি হলটোত প্ৰশিক্ষণৰত কণ-কণ প্ৰশিক্ষাৰ্থী, অভিভাৱককে ধৰি উপস্থিত কেইবাশও লোকে প্ৰকাশিত বাতৰিটো আৰু পৰিৱেশক কাজিৰঙাৰ সাংবাদিকজনক গৰিহণা দিয়াৰ লগতে ‘বোকাখাতলৈ আহি বিভ্ৰান্তিৰ সৃষ্টি নকৰিবলৈ সকীয়াই’ দিয়ে৷
পৰিত্যক্ত চিনেমা হলটোত ‘এসময়ত গঢ় লৈ উঠা অসামাজিক কাম-কাজ’ বন্ধ কৰি যুৱকসকলে বেডমিন্টন ক’ৰ্ট নিৰ্মাণ কৰাটোৰ শলাগ লৈছে স্থানীয় একাংশ ৰাইজে।
