ক’ৰ’না ভাইৰাছৰ সংহাৰ অন্ত পৰাৰ পিছতে ভাৰতৰ আটাইতকৈ সফল ফুটবলাৰ হিচাপে পৰিচিত বাইচুং ভুটীয়াৰ নামত নিৰ্মাণ কৰা ফুটবল ষ্টেডিয়ামখন মুকলি কৰা হ’ব।
বাইচুঙে জন্মগ্ৰহণ কৰা টিনকিটামৰ পৰা ২৫ কিলোমিটৰ নিলগৰ নামচিত নিৰ্মাণ কৰা হৈছে ষ্টেডিয়ামখন।
১৫ হাজাৰ চিট কেপাচিটিৰে নিৰ্মিত ষ্টেডিয়ামখন সম্পূৰ্ণ হৈ উঠিছে আৰু ক’ৰ’নাৰ সংহাৰ অন্ত পৰাৰ লগে লগে মুকলি কৰা হ’ব বুলি ছিকিম ফুটবল এছ’চিয়েশ্যনৰ সভাপতি মেনলা এথেনপাই জনায়।
সভাপতি এথেনপাই কয়, ‘ভাৰতৰ অন্যতম শ্ৰেষ্ঠ ফুটবলগৰাকীলৈ এয়া আমাৰ সন্মান। তেওঁ ভাৰতীয় ফুটবললৈ আগবঢ়োৱা বৰঙণি আমি কোনো প্ৰকাৰে পৰিশোধ কৰিব নোৱাৰো। কিন্তু তেওঁৰ নামেৰে এখন ফুটবল ষ্টেডিয়াম নামকৰণ কৰি তেওঁক আমি সামান্য সন্মান জনাব পাৰো’।
উল্লেখ্য যে ২০১০ চনতে নিৰ্মাণ কাৰ্য শুভাৰম্ভ কৰিছিল যদিও আৰ্থিক সমস্যাৰ বাবে যথা সময়ত ষ্টেডিয়ামখন সম্পূৰ্ণ কৰিব পৰা নাছিল।
ইফালে বাইচুং ভুটীয়াৰ নামেৰে নামকৰণ হ’ব লগীয়া ষ্টেডিয়ামখনৰ প্ৰসংগত ভুটীয়াই কয়, ‘মোৰ বাবে এয়া সন্মান আৰু যথেষ্ট উৎসাহিত হৈ আছো। এই ষ্টেডিয়ামখনে ফুটবলৰ উত্তৰণত বহু অৰিহনা যোগাব’।
তেওঁ লগতে কয়, ‘উক্ত ষ্টেডিয়ামখনে মোৰ দৰে বহু ফুটবলাৰক জন্ম দিছে। এইখনৰ সৈতে মোৰ বহুত স্মৃতি আছে’।
উল্লেখ্য যে অৰ্জন বঁটা আৰু পদ্মশ্ৰী বঁটা প্ৰাপক এইগৰাকী প্ৰাক্তন ফুটবলাৰে হৈছে প্ৰথম যাৰ নামত ভাৰতত এখন ফুটবল ষ্টেডিয়াম নিৰ্মাণ কৰা হৈছে।
