বাংলাদেশৰ আদালতে অস্ত্ৰ সৰবৰাহৰ গোচৰত আলফাৰ মুৰব্বী পৰেশ বৰুৱাৰ মৃত্যুদণ্ড বাতিল কৰিছে। একেটা গোচৰতে বাংলাদেশৰ প্ৰাক্তন গৃহ ৰাজ্য মন্ত্ৰী লুটফুজ্জামান বাবৰকে ধৰি ৬ জনৰ মৃত্যুদণ্ডও বাতিল কৰা হৈছে।
এই গোচৰত ডেথ ৰেফাৰেন্স (মৃত্যুদণ্ডৰ শাস্তি অনুমোদন) আৰু দোষীসকলৰ আবেদন গোচৰৰ শুনানিৰ পিছত ন্যায়াধীশ মুস্তাফা জামান ইছলাম আৰু ন্যায়াধীশ নাছৰিন আখতাৰৰ বিভাগীয় বিচাৰপীঠে এই ৰায়দান কৰে। বুধবাৰে এই ৰায়দান প্ৰদান কৰা হয়।
ইয়াৰ পূৰ্বে ১০খন ট্ৰাকত অস্ত্ৰ সৰবৰাহ কৰাৰ অপৰাধত তেওঁলোকক মৃত্যুদণ্ডৰ শাস্তি প্ৰদান কৰা হৈছিল। এই গোচৰত লুটফুজ্জামান বাবৰ আৰু অৱসৰপ্ৰাপ্ত মেজৰ জেনেৰেল ৰেজ্জাকুল হাইদৰ চৌধুৰীকে ধৰি চাৰিজন লোকক দোষমুক্ত কৰাৰ নিৰ্দেশ দিয়া হৈছে।
আজিৰ দিনটোতে আদালতে সেই গোচৰত মৃত্যুদণ্ডৰ শাস্তি পোৱা আন ছয়জন ব্যক্তিৰ শাস্তি ১০ বছৰলৈ হ্ৰাস কৰে। লগতে বিচ্ছিন্নতাবাদী সংগঠন আলফাৰ মুৰব্বী পৰেশ বৰুৱাৰ মৃত্যুদণ্ড বাতিল যাৱজ্জীৱন কাৰাদণ্ডৰ শাস্তি প্ৰদান কৰা হৈছে।
জানিব পৰা মতে, ২০০৪ চনৰ ১ এপ্ৰিলত চট্টগ্ৰামৰ চি ইউ এফ এল ঘাটৰ পৰা ১০খন অস্ত্ৰ ভৰ্তি ট্ৰাক জব্দ কৰা হৈছিল। এই সন্দৰ্ভত কৰ্ণাফুলি থানাত অস্ত্ৰ আইন আৰু বিশেষ ক্ষমতা আইনৰ অধীনত দুটা গোচৰ ৰুজু কৰা হয়।
এই গোচৰ ৰুজু হোৱাৰ সময়ত বাংলাদেশত বিএনপি ক্ষমতাত আছিল। সেই চৰকাৰৰ মন্ত্ৰী আছিল লুটফুজ্জামান। সেই সময়ত পৰেশ বৰুৱাই বাংলাদেশৰ পৰা ভাৰতত ‘অভিযান’ চলাই আছিল।
সূত্ৰ অনুসৰি সেই গোচৰত যিসকলৰ নাম উল্লেখ কৰা হৈছিল তেওঁলোকক মেট্ৰ’পলিটান চেচন জজ আদালত আৰু বিশেষ ন্যায়াধিকৰণ-১ য়ে শাস্তি প্ৰদান কৰিছিল। ২০১৪ চনৰ ৩০ জানুৱাৰীত এই ৰায়দান দিয়া হৈছিল। তাত ১৪ জন লোকৰ ফাঁচীৰ নিৰ্দেশ দিয়া হয়। ইয়াৰ ভিতৰত বাংলাদেশৰ প্ৰাক্তন উদ্যোগ মন্ত্ৰী তথা জামাত-ই-ইছলামীৰ আমিৰ মতিউৰ ৰহমান নিজামীক ফাঁচী দিয়া হয়। আন এটা গোচৰত এই ফাঁচী কাৰ্যকৰী কৰা হৈছিল।
তেতিয়াই পৰেশ বৰুৱাক ফাঁচীৰ নিৰ্দেশ দিয়া হৈছিল। ইয়াৰ পিছত ২০১৪ চনৰ ৬ ফেব্ৰুৱাৰীৰ ৰায়দানৰ সৈতে গোচৰৰ নথি-পত্ৰ উচ্চ ন্যায়ালয়ৰ ডেথ ৰেফাৰেন্স শাখালৈ প্ৰেৰণ কৰা হয়। শাস্তি লাভ কৰাসকলে ২০১৪ চনত উচ্চ ন্যায়ালয়ত এই ৰায়ৰ বিৰুদ্ধে পৃথক আবেদন দাখিল কৰিছিল।
