চীনে আৰম্ভ কৰিছে বিশ্বৰ সৰ্ববৃহৎ জলবিদ্যুৎ প্ৰকল্প নিৰ্মাণৰ প্ৰস্তুতি। এই প্ৰকল্প সন্দৰ্ভত বিশ্বজুৰি প্ৰতিক্ৰিয়া অব্যাহত আছে। বিশেষজ্ঞসকলে দাবি কৰিছে যে এই জলবিদ্যুৎ প্ৰকল্পৰ প্ৰভাৱ বাংলাদেশ, ভাৰত আদি দেশসমূহৰ ওপৰত পৰাৰ সম্ভাৱনা আছে।
ইয়াৰ মাজতে বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছে বাংলাদেশৰ নদী আৰু জলসম্পদ পৰিচালনাৰ বাবে ৫০ বছৰীয়া মাষ্টাৰপ্লেন প্ৰদান কৰিবলৈ চীনক অনুৰোধ কৰিছে।
চীনৰ জলসম্পদ মন্ত্ৰী লি গুয়িংৰ সৈতে সাক্ষাতৰ সময়ত ইউনুছে এই আহ্বান জনাইছিল। ইউনুছে চীনা জল আৰু বান্ধ ব্যৱস্থাপনা প্ৰণালীৰ প্ৰশংসা কৰি কয়, চীনে পানীৰ সমস্যা নিয়ন্ত্ৰণ কৰাত সফল হৈছে, আৰু তেওঁলোকেও সেই ব্যৱস্থাপনাৰ জৰিয়তে সফলতা লাভ কৰিব বিচাৰে।
তেওঁ লগতে কয় বাংলাদেশ এখন বদ্বীপৰ দেশ, য’ত বাৰে বাৰে বান আহে। জনসংখ্যা বৃদ্ধি আৰু পৰিৱর্তিত পৰিস্থিতিত সাৱধানতাৰ প্ৰয়োজন। তেওঁ বাংলাদেশৰ ব্ৰহ্মপুত্ৰ নদী আৰু চীনা জলবিদ্যুৎ প্ৰকল্পৰ বিষয়ে ভাৰতৰ উদ্বেগৰ বিষয়েও উত্থাপন কৰে। বিশেষজ্ঞসকলে শংকা প্ৰকাশ কৰিছে যে চীনৰ ১৩৭ বিলিয়ন ডলাৰ জলবিদ্যুৎ প্ৰকল্পৰ নিৰ্মাণে ভাৰত আৰু বাংলাদেশৰ ওপৰত বিশেষ প্ৰভাব পেলাব।
চীনৰ থ্ৰী গৰ্জেছ বান্ধতকৈ এই প্ৰকল্পই তিনিগুণ শক্তি উৎপাদন কৰিব যদিও চীনে ব্ৰহ্মপুত্ৰৰ ওপৰত এই জলবিদ্যুৎ প্ৰকল্পৰ প্ৰভাৱক লৈ উদ্বেগ প্ৰকাশ কৰিছে, তথাপি এই প্ৰকল্পৰ নিৰ্মাণে ভাৰত আৰু বাংলাদেশৰ জলসম্পদ ব্যৱস্থাপনাৰ ক্ষেত্ৰত এক গুৰুত্বপূৰ্ণ প্ৰত্যাহ্বানৰ সন্মুখীন হ’ব।
প্ৰতিবেদন অনুসৰি বেংককত মোদী আৰু ইউনুছৰ মাজত বৈঠকৰ ব্যৱস্থা কৰিবলৈ ঢাকাই নতুন দিল্লীৰ কাষ চাপিছে । অৱশ্যে ভাৰতে এই অনুৰোধটোৰ ক্ষেত্ৰত সিদ্ধান্ত ল’ব নোৱাৰে বুলি বিষয়টোৰ পৰা গা এৰি চলিছে । ইফালে শনিবাৰে চীন ভ্ৰমণৰ সামৰণিৰ সময়ত ইউনুছে চীনা বিনিয়োগকাৰীসকলক বাংলাদেশৰ তিস্তা নদীৰ জল ব্যৱস্থাপনা প্ৰকল্পত অংশগ্ৰহণ কৰিবলৈ আমন্ত্ৰণ জনাইছে। উল্লেখ যে ইয়াৰ পূৰ্বে হাছিনাই ভাৰতক একে অনুৰোধ কৰিছিল।
ইউনুছৰ এনে কাৰ্য কলাপে ভাৰত আৰু বাংলাদেশৰ দ্বিপাক্ষিক সম্পৰ্কৰ ওপৰত গুৰুত্বপূৰ্ণ প্ৰভাৱ পেলাব। ইয়াৰ পিছত দুই দেশৰ সম্পৰ্ক কোন দিশে গতি কৰিব সেয়া লক্ষণীয় হ’ব।
