আৰক্ষীৰ গুলীত প্ৰাণ দিয়া চাৰি চহিদক স্মৰণ বৰপেটা আমছুৰ

জাতীয় স্বাৰ্থত প্ৰাণ আহুতি দিয়া চাৰি গৰাকী চহিদক স্মৰণাৰ্থে আজি বৰপেটা জিলা আমছুৰ উদ্যোগত আৰু হাউলী নগৰ আঞ্চলিক আমছুৰ সহযোগত হাউলীস্থ জামিয়া-ই-উলুম মাদ্ৰাছা প্ৰাঙ্গণত দিনজোৰা কাৰ্যসূচীৰে এখন চহিদ স্মৃতিচাৰণ সভা অনুষ্ঠিত হয়।

কাৰ্যসূচী অনুসৰি জিলা আমছুৰ সভাপতি নজৰুল ইছলামৰ পৌৰোহিত্যত অনুষ্ঠিত স্মৃতিচাৰণ সভাত আমছুৰ প্ৰাক্তন সভাপতি আব্দুৰ ৰহিম আহমেদ, প্ৰাক্তন উপ সভাপতি আবু তাহেৰ, জিলা আমছুৰ উপদেষ্টা মইনুল হক খান, হোমাৰ অধ্যক্ষ আঃআজিজকে ধৰি ভালেমান বিশিষ্ট ব্যাক্তি উপস্থিত থাকি বক্তব্য আগবঢ়ায়।

জিলা আমছুৰ কাৰ্যকৰী সভাপতি ছফিউৰ ৰহমানৰ আদৰণি ভাষনেৰে আৰম্ভ হোৱা সভাত ৪ গৰাকী চহিদ পৰিয়ালক বিশেষভাৱে সম্বৰ্ধনা জনোৱা হয়।

উল্লেখযোগ্য যে ৰাষ্ট্ৰীয় নাগৰিক পঞ্জীৰ পাইলট প্ৰজেক্টত থকা আসোঁৱাহসমূহ দূৰ কৰি এখন শুদ্ধ এন আৰ চি প্ৰস্তুতকৰণৰ দাবীত ২০১০ চনৰ ২১ জুলাইত আমছুৰ বৰপেটা জিলা সমিতিৰ উদ্যোগত বৰপেটা জিলা উপায়ুক্তৰ কাৰ্যালয় ঘেৰাও কাৰ্যসূচী গ্ৰহন কৰা হৈছিল।

উক্ত প্ৰতিবাদত অংশগ্ৰহণ কৰা সহস্ৰাধিক প্ৰতিবাদকাৰী আৰু আমছুৰ সমৰ্থকক তদানীন্তন কংগ্ৰেছ চৰকাৰৰ আৰক্ষী বাহিনীয়ে নিৰ্বিচাৰে গুলিবৰ্ষণ কৰাত ডেৰ শতাধিক প্ৰতিবাদকাৰী আহত হোৱাৰ উপৰি মাজম আলী, খন্দকাৰ মতলেব, মাইদুল ইছলাম আৰু ছিৰাজুল ইছলাম নামৰ ৪জন প্ৰতিবাদকাৰী থিতাতে নিহত হৈছিল।