বিজেপি নেতৃত্বাধীন কেন্দ্রীয় চৰকাৰে নাগৰিকত্ব সংশোধনী বিধেয়ক ২০১৬ গৃহীত কৰাবলৈ দৃঢ় পদক্ষেপ গ্ৰহণ কৰাৰ পাছত উদ্বিগ্ন হৈ পৰা উত্তৰ-পূৰ্বাঞ্চলৰ জাতীয় দল-সংগঠনসমূহ গৈ নতুন দিল্লীত উপস্থিত হৈছেহি।
ইতিমধ্যে আছু, নেছ’ কৃষক মুক্তি, অসম গণ পৰিষদৰ প্ৰতিনিধিয়ে নতুন দিল্লীত বাহৰ পাতি থকাৰ সমান্তৰালকৈ কংগ্ৰেছ আৰু বিজেপিয়েও নিজৰ ৰাজনৈতিক লক্ষ্যৰে বিধেয়কখনকলৈ ৰণকৌশলত ব্যস্ত হৈ পৰিছে।
অসম বিধানসভাৰ বিৰোধী দলপতি দেবব্ৰত শইকীয়াই কংগ্ৰেছে ৰাজ্যসভাত বিৰোধীক ঐক্যবদ্ধ কৰি নেতৃত্ব দিয়াৰ প্ৰস্তুতি চলোৱাৰ কথা জানিবলৈ দি প্ৰয়োজনত সদন বন্ধ কৰি তোলাৰো সম্ভাৱনা ব্যক্ত কৰে।
উল্লেখযোগ্য যে শনিবাৰে প্ৰধান মন্ত্ৰী নৰেন্দ্ৰ মোদীয়ে গুৱাহাটীত ৰাজ্যখনত চলি থকা প্ৰবল প্ৰতিবাদকো আওকান কৰি চলিত ৰাজ্যসভাৰ অধিৱেশনতে বিধেয়কখন গৃহীত কৰাৰ বাবে দলৰ দৃঢ় সংকল্পৰ কথা ঘোষণা কৰিছিল।
কংগ্ৰেছে এনডিএৰ দুই সহযোগী দল শিৱসেনা আৰু জনতা দল(ইউ)ৰ সমৰ্থনত ৰাজ্যসভাত বিধেয়কখনৰ তীব্ৰ বিৰোধিতা কৰাৰ সিদ্ধান্ত গ্ৰহণ কৰাৰ বিপৰীতে বিজেপিয়ে পৰিস্থিতিৰ সুযোগ গ্ৰহণ কৰি মৌখিক ভোটত সদনত বিধেয়কখন গৃহীত কৰাৰ প্ৰচেষ্টা চলাব।
ইপিনে, নেছ’ আৰু আছুৰ প্ৰতিনিধিয়ে সমাজবাদী আৰু বহুজন সমাজবাদী পাৰ্টিৰ সমৰ্থন আদায়ৰ প্ৰচেষ্টা অব্যাহত ৰাখিছে। তদুপৰি, শাসকীয় দলৰ কেইগৰাকীমান অসন্তুষ্ট নেতাৰ সৈতেও তেওঁলোকে সম্পৰ্ক ৰক্ষা কৰি চলিছে।
বৰ্তমান বিশেষ একো নঘটিলে বিধেয়কখন আইনত পৰিণত হোৱাটো নিশ্চিত হৈ পৰিছে আৰু সেয়ে হ’লে আদালতৰ দ্বাৰস্থ হোৱাৰ বাহিৰে আন কোনো উপায় নাথাকিব। এতিয়া ৰাজ্যসভাৰ কাৰ্যক্ৰমণিকাত বিধেয়কখনৰ বিষয়টো ৰখা হ’বনে নাই সেয়া আজি স্পষ্ট হৈ পৰিব। আজি আৰু কাইলৈ ৰাজ্যসভাত ৰাষ্ট্ৰপতিৰ ভাষণৰ ওপৰত আলোচনা চলাৰ পাছত সদনৰ শেষ দিনটোত পৰি থকা বিধেয়কসমূহ উত্থাপন কৰিব।
