চলিত বছৰৰ ২৬ ছেপ্তেম্বৰৰ পৰা আই পি এল ২০২০ আয়োজন কৰাৰ কুচকাৱাজ আৰম্ভ কৰিছে বি চি চি আইয়ে।
প্ৰকাশ পোৱা মতে, ইতিমধ্যে বি চি চি আইয়ে সকলো ফ্ৰেঞ্চাইজি, সংবাদ মাধ্যমৰ সহযোগী আৰু ষ্টেকহ’ল্ডাৰৰ সৈতে কথা-বতৰা আৰম্ভ কৰিছে।
তদুপৰি বি চি চি আই্ সভাপতি সৌৰভ গাংগুলীয়ে আই পি এল আয়োজন সন্দৰ্ভত সদস্য সংস্থাসমূহলৈ পত্ৰ প্ৰেৰণ কৰা বুলি জানিব পৰা গৈছে।
অৱশ্যে, অক্টোবৰ-নৱেম্বৰত অষ্ট্ৰেলিয়াত অনুষ্ঠিত হ’বলগীয়া টি-২০ বিশ্বকাপ পিছুৱাই দিলেহে আই পি এল আয়োজন কৰাটো সম্ভৱপৰ হ’ব।
এই ন্দৰ্ভত বি চি চি আই্ এটা সূত্ৰই কয়, ‘আমি পৰিকল্পনা কৰি ৰৈ থাকিব নোৱাৰে। আই চি চিয়ে বিশ্বকাপ সন্দৰ্ভত সিদ্ধান্ত লওক। তেতিয়াহে আমি আই পি এল আয়োজন সন্দৰ্ভত আগবাঢ়িব পাৰিম’।
ইফালে মুম্বাই মিৰৰ কাকতত প্ৰকাশ পাইছে আই পি এলৰ নতুন সময়সূচী। কাকতখনৰ মতে ২৬ ছেপ্তেম্বৰত আৰম্ভ হৈ ৮ নৱেম্বৰত টুৰ্ণামেণ্টখথন অন্ত পৰিব।
অৱশ্যে এই পৰ্যন্ত বি চি চি আইয়ে টুৰ্ণামেণ্টখনৰ খেলসমূহ ক’ত অনুষ্ঠিত হ’ব সেই সম্পৰ্কে একো স্পষ্ট সিদ্ধান্ত ল’ব পৰা নাই।
উল্লেখ্য যে মাৰ্চৰ শেষৰ ফালে আৰম্ভ হ’বলগীয়া চলিত বৰ্ষৰ আই পি এল মহামাৰী ক’ৰ’না ভাইৰাছৰ ভয়াবহতাৰ বাবে অনিৰ্দিষ্টকাললৈ স্থগিত ৰাখিছে।
