বিধ্বংসী ঘূৰ্ণী বতাহ ‘ফেনি’য়ে সম্ভৱত: আজি নিশা বা কাইলৈ পুৱাতেই অসম তথা উত্তৰ পূৰ্বাঞ্চলৰ আন ৰাজ্যসমূহত প্ৰৱেশ কৰিব। অঞ্চলটোৰ বেছিভাগ ঠাইতেই ধাৰাসাৰ বৃষ্টিপাতৰ লগতে প্ৰচণ্ড ধুমুহাই কোবাই যোৱাৰ আশংকা কৰা হৈছে।
‘ফেনি’ৰ পৰা হাত সাৰিবলৈ আপুনি কেনেদৰে প্ৰস্তুত হ’বঃ
১. ধাৰাসাৰ বৃষ্টিপাতৰ লগতে প্ৰচণ্ড ধুমুহা হোৱাৰ সম্ভাৱনা আছে। গতিকে, ঘৰৰ বাহিৰলৈ নোলাব, অতি জৰুৰী প্ৰয়োজনতহে বাহিৰলৈ যাব।
২. উক্ত সময়ছোৱাত বিদ্যুৎ সংযোগ ব্যাহত হ’ব পাৰে। গতিকে, ঘৰত বিকল্প পোহৰৰ ব্যৱস্থা সাজু কৰি ৰাখিব। ঘৰত টৰ্চ লাইট আৰু মমবাতি ৰখাটো বাঞ্চনীয়।
৩. ঘৰত পৰ্যাপ্ত প্ৰয়োজনীয় দৰৱ পাতি মজুত ৰাখক কিয়নো প্ৰবল বৰষুণৰ বাবে আপুনি বাহিৰলৈ ওলাই যাব নোৱাৰিবও পাৰে।
৪.কোনো আকস্মিক ঘটনাৰ বাবে প্ৰাথমিক চিকিৎসাৰ বাবে প্ৰয়োজনীয় আহিলাসমূহ (ফাৰ্ষ্ট এইড বক্স) গোটাই ৰাখক।
৫. নদী বা জলাশয় আদিৰ পৰা আঁতৰি থাকক কিয়নো নেৰানেপেৰা ধাৰাসাৰ বৰষুণৰ ফলত ইয়াৰ পানী বিপদ সীমা অতিক্ৰম কৰিব পাৰে।
৬. স্থানীয় আৰক্ষীৰ বা অসম ৰাজ্যিক দুৰ্যোগ ব্যৱস্থাপনা কৰ্তৃপক্ষৰ ফোন নম্বৰ মজুত ৰাখক যাতে আকস্মিক বিপদৰ সময়ত আপুনি সহায়ৰ বাবে যোগাযোগ কৰিব পাৰে।
৭.‘’ফেনি ঘূৰ্ণী বতাহ’ৰ শেহতীয়া তথ্যৰ বাবে ৰেডিঅ’ বা টিভিৰ বাতৰি পৰ্যবেক্ষণ কৰক।
