যান-বাহন পৰিবহণৰ নিয়ম উলংঘনৰ বাবে সাধাৰণ নাগৰিকক ট্ৰেফিক আৰক্ষীয়ে জৰিমনা বিহা এক সাধাৰণ দৃশ্য। একেদৰে এগৰাকী সাধাৰণ নাগৰিকে ট্ৰেফিক নীতি উলংঘন কৰাটোও এটা সাধাৰণ দৃশ্যই।
কিন্তু ট্ৰেফিক আৰক্ষী বিভাগত কৰ্মৰত এগৰাকী আৰক্ষী কৰ্মীয়ে যেতিয়া ট্ৰেফিক নীতি উলংঘন কৰে, ইয়াক সাধাৰণ কথা বুলি মানি ল’ব পাৰিনে ?
বেংগালুৰুৰ আৰটি নগৰৰ এগৰাকী ট্ৰেফিক আৰক্ষী কৰ্মীয়ে শেহতীয়াকৈ ট্ৰেফিক আইন ভংগ কৰি ভৰিবলগীয়া হৈছে জৰিমনা। সম্প্ৰতি সামাজিক মাধ্যমত ভাইৰেল হৈ পৰিছে এই ট্ৰেফিক কৰ্মীগৰাকীক আন এগৰাকী ট্ৰেফিক আৰক্ষী কৰ্মীয়ে চালান কটাৰ দৃশ্য।
বাহন চলোৱাৰ সময়ত সম্পূৰ্ণ সুৰক্ষা নথকা এটা আধা হেলমেট পৰিধান কৰাৰ বাবে জৰিমনাৰ সন্মুখীন হৈছে ট্ৰেফিক কৰ্মীগৰাকী।
টুইটাৰযোগে আৰ টি নগৰ ট্ৰেফিক বিটিপিয়ে এই আৰক্ষী কৰ্মীগৰাকীক আন এগৰাকী ট্ৰেফিক কৰ্মীয়ে গিয়াৰলেছ স্কুটাৰ চলাই থকা সময়ত ভুল হেলমেট পিন্ধাৰ বাবে জৰিমনা বিহা ছবি শ্বেয়াৰ কৰিছে।
আৰ টি নগৰ আৰক্ষীয়ে যোৱা সোমবাৰে এই ছবিখন টুইটাৰত শ্বেয়াৰ কৰিছিল। তাৰ পাছতে এই ছবিখন সামাজিক মাধ্যমত দ্ৰুতগতিত ভাইৰেল হৈ পৰে।
সামাজিক মাধ্যমত কিছু লোকে ট্ৰেফিক নিয়ম উলংঘা কৰা আৰক্ষী কৰ্মীগৰাকীক শাস্তি বিহাৰ বাবে আৰক্ষীক প্ৰশংসা কৰিছে যদিও আন কিছু লোকে এইয়া প্ৰচাৰমুখীতাহে বুলি সন্দেহ কৰিছে।
ছবিখনত জৰিমনাৰ সন্মুখীন হোৱা আৰক্ষী গৰাকীয়ে হাঁহি থকাৰ দৃশ্য দেখি এগৰাকী লোকে এয়া কেৱল প্ৰচাৰধৰ্মী উদ্দেশ্যে ফটোৰ বাবে প’জ দিয়া বুলি মন্তব্য কৰে।
আন এগৰাকীয়ে আকৌ ফটোখনৰ দোহাই দি বহু আৰক্ষী কৰ্মী-বিষয়াই বিভাগীয় লোক হোৱাৰ বাবেই হেলমেট অবিহনে বা আন নিয়ম নমনাকৈ যান-বাহন চলায় বুলি অভিযোগ কৰিছে।
সি যি নহও, এনে সমালোচনাৰ মাজতো ছবিখনে এতিয়া ব্যাপক চৰ্চা লাভ কৰিছে। সমসাময়িকভাৱে ট্ৰেফিক আৰক্ষীয়েই ট্ৰেফিক নিয়ম উলংঘা কৰাৰ দৃশ্যই ক্ষুদ্ধ কৰিছে সাধাৰণ লোকক।
