‘সুধাকণ্ঠ ড০ ভূপেন হাজিৰকাৰ নিত্য ব্যৱহৃত হাৰমনিয়ামখন এতিয়াও সযতনে ৰখা হৈছে শ্ৰীমন্ত শংকৰদেৱ কলাক্ষেত্ৰত। সুধাকণ্ঠই নিজে দি যোৱা এই হাৰমনিয়ামখন দৰ্শকৰ ওচৰত প্ৰদৰ্শনৰ বাবে বৰ্তমানেও শ্ৰীমন্ত শংকৰদেৱ কলাক্ষেত্ৰৰ সংগ্ৰহালয়ত আছে।’ এই কথা সদৰী কৰিছে ভূপেন হাজৰিকা সাংস্কৃতিক ন্যাসে।
উল্লেখযোগ্য যে ২১ জুনত ভৰলুমুখস্থিত সোণাৰাম খেলপথাৰত জিলা প্ৰশাসন তথা পৰ্যটন বিভাগৰ উদ্যোগত আয়োজন কৰা অম্বুবাচা মেলাৰ উদ্বোধনী অনুষ্ঠানৰ সংগীতানুষ্ঠানত অংশ গ্ৰহণৰ সময়ত বলীউডৰ কণ্ঠশিল্পী কৈলাশ খেৰে পাঁচ লাখ টকাত সুধাকণ্ঠৰ সৈতে ছাঁৰ দৰে থকা হাৰমনিয়মাটো নিলামত ক্ৰয় কৰা বুলি উল্লেখ কৰিছিল।
ইয়াৰ পিছতে অসমৰ ৰাইজৰ জ্ঞাতাৰ্থে ভূপেন হাজৰিকা সাংস্কৃতিক ন্যাসে এক বিবৃতিযোগে এই কথা সদৰী কৰে। বিবৃতিটোক সাংস্কৃতিক ন্যাসৰ তৰফৰা পৰা যুটীয়া সম্পাদক মনীষা হাজৰিকা আৰু মঞ্জুলা হাজৰিকাই কৈলাশ খেৰৰ উক্ত মন্তব্যৰ পিছতে ৰাইজৰ মাজত হ’ব পৰা সন্দেহ আঁতৰ কৰিবৰ বাবেই এই বিবৃতিযোগে এই কথা জনায়।
বিবৃতিটোত ন্যাসৰ যুটীয়া সম্পাদকদ্বয়ে কয় যে ভূপেন হাজৰিকা সাংস্কৃতিক ন্যাসে জানিব পৰা মতে মুম্বাইৰ এটা প্ৰতিষ্ঠিত সাংস্কৃতিক সামাজিক অনুষ্ঠান সিদ্ধাৰ্থ কাকৰ ‘সুৰভি ফাউণ্ডেশ্যন’এ ভাৰতৰ বহুসংখ্যক বিখ্যাত ব্যক্তিৰ ব্যৱহৃত কিছু সা-সামগ্ৰী সংগ্ৰহ কৰি সেই সামগ্ৰী সমূহ সঠিকভাৱে সংৰক্ষণ কৰিব পৰা ব্যক্তিৰ মাজত নিলাম কৰে। তাৰ পৰা অৰ্জন কৰা ধনেৰে সামাজিক-সাংস্কৃতি কাম-কাজ কৰে।
লগতে তেওঁলোকে কয় যে সুধাকণ্ঠৰ সংগী প্ৰয়াত কল্পনা লাজমীয়ে ড০ ভূপেন হাজৰিকাই ব্যৱহাৰ কৰা এখন হাৰমনিয়াম অনুষ্ঠানটোক দিয়া বুলি আমাক জনাইছিল। হয়তো সেই হাৰমনিয়ামখনকে নিলামত ক্ৰয় কৰাৰ কথা উল্লেখ কৰিছে কৈলাশ খেৰে।
