ৰুছ-ইউক্ৰেইনৰ যুদ্ধৰ মাজতে প্ৰথমবাৰলৈ কিয়েভত উপস্থিত হ’ল আমেৰিকাৰ ৰাষ্ট্ৰপতি জ’ বাইডেন। আজি আচম্বিতে যুদ্ধৰত দেশ ইউক্ৰেইনৰ ৰাজধানী কিয়েভ ভ্ৰমণ কৰে আমেৰিকা যুক্তৰাষ্ট্ৰৰ ৰাষ্ট্ৰপতিগৰাকীয়ে।
২০২২ চনত ২৪ ফেব্ৰুৱাৰীত ৰাছিয়াই ইউক্ৰেইন আক্ৰমণ কৰাৰ পিছত এইদৰে প্ৰথমবাৰৰ বাবে কিয়েভ ভ্ৰমণ কৰিছে আমেৰিকাৰ ৰাষ্ট্ৰপতিয়ে। এইদৰে কিয়েভত উপস্থিত হৈ ইউক্ৰেইনৰ প্ৰতি সমৰ্থন আগবঢ়াই জ’ বাইডেনে।
বাইডেনক বিমানৰ পৰা আদৰি নিয়ে ইউক্ৰেইনৰ সামৰিক বাহিনী আৰু ৰাষ্ট্ৰপতি জেলেনস্কীয়ে। দুই দেশৰ ৰাষ্ট্ৰপ্ৰধান লগ হৈ যুদ্ধত নিহত হোৱা সেনা আৰু বিষয়া তথা নাগৰিক সকলৰ স্মৃতিত নিৰ্মিত স্মাৰকত শ্ৰদ্ধাঞ্জলী জ্ঞাপন কৰে।
শ্ৰদ্ধাঞ্জলী জ্ঞাপন কৰাৰ সময়ত সামৰিক চেলুট জনাই কিছু সময় মৌন প্ৰাৰ্থনা কৰে দুয়োগৰাকী ৰাষ্ট্ৰপ্ৰধান আৰু সামৰিক সেনা-বিষয়া সকলে।
আন্তঃৰাষ্ট্ৰীয় সংবাদ মাধ্যমত প্ৰকাশ পোৱা অনুসৰি বাইডেনৰ ইউক্ৰেইন ভ্ৰমণ অতি গুৰুত্বপূৰ্ণ হিচাপে বিবেচিত হৈছে। কিয়নো ৰুছ-ইউক্ৰেইন যুদ্ধত ইউক্ৰেইনলৈ পূৰ্ণ সমৰ্থন আগবঢ়াই আমেৰিকাই প্ৰদান কৰি আহিছে সামৰিক সাহায্য।
প্ৰকাশিত খবৰ অনুসৰি, আজি কিয়েভত জেলেনস্কীৰ সৈতে হোৱা সাক্ষাতত বাইডেনে অনাগত সময়ত ইউক্ৰেইনলৈ যুদ্ধৰ বাবে অধিক সাহায্য প্ৰদান কৰি ইউক্ৰেইনৰ ভূখণ্ডৰ অখণ্ডতা ৰক্ষা কৰাৰ ক্ষেত্ৰত সহায় আগবঢ়াব বুলি প্ৰতিশ্ৰুতি দিয়ে।
হোৱাইট হাউছৰ পৰা প্ৰকাশ পোৱা এটা প্ৰেছ বিবৃতিত বাইডেনৰ উদ্ধৃতিৰে কোৱা হৈছে, “ইউক্ৰেইনৰ জনসাধাৰণক আকাশী বোমাবৰ্ষণৰ পৰা ৰক্ষা কৰাত সহায়ক হোৱাকৈ আৰ্টিলাৰী গোলাবাৰুদ, এণ্টি আৰ্মৰ চিষ্টেম, এয়াৰ চাৰ্ভিলেন্স ৰাডাৰকে ধৰি আন বহুতো জটিল সঁজুলি পঠোৱাৰ কথা ঘোষণা কৰা হ’ব।”
ইফালে ইউক্ৰেইনৰ ৰাষ্ট্ৰপতি জেলেনস্কিয়ে বাইডেনৰ এই ভ্ৰমণক লৈ যথেষ্ট সুখী অনুভৱ কৰিছে বুলি সদৰী কৰিছে।
