চামগুৰিত আৰক্ষীৰ আকস্মিক অভিযানত আটক দুৰ্ধৰ্ষ বাইক চোৰ
নগাঁও জিলাৰ চামগুৰিত মঙলবাৰে আৰক্ষীয়ে আকস্মিকভাৱে অভিযান চলাই এটা দুৰ্ধৰ্ষ বাইক চোৰক আটক কৰিবলৈ সক্ষম হয়। খাটোৱাল আৰক্ষী থানাৰ অন্তৰ্গত হেমাৰবড়ী গাঁৱত নিশা অভিযান চলাই আটক কৰে চোৰটোক।
আৰক্ষীয়ে বিশেষ সূত্ৰৰ পমখেদি নিশা অভিযান চলাই চোৰটোৰ লগতে এখন চুৰি হোৱা এ এচ-০২ এফ-৯৬৮৭ নম্বৰৰ হিৰো হোণ্ডা স্পে্লন্ডাৰ বাইকখন উদ্ধাৰ কৰে। স্থানীয় ৰাইজৰ সহযোগত আৰক্ষীয়ে আটক কৰা বাইক চোৰটোৰ নাম আৰ্জিকুৰ ইছলাম (১৯) বুলি জানিব পৰা গৈছে।
উল্লেখযোগ্য যে, উদ্ধাৰহোৱা বাইকখন সন্দৰ্ভত বাইকখনৰ স্বত্তাধিকাৰীয়ে চামগুৰি থানাত ৰুজু কৰা ৩৪৭/১৯ নম্বৰ গোচৰৰ ভিত্তিতে আৰক্ষীৰ দলটোৱে অভিযান চলাই বাইকসহ চোৰটোক আটক কৰিবলৈ সক্ষম হয়।
আনহাতে, স্থানীয় ৰাইজে অঞ্চলটোত দীৰ্ঘদিনৰ পৰা এটা গাড়ী চোৰৰ চক্ৰ সক্ৰিয় হৈ আছে বুলি অভিযোগ উত্থাপন কৰি শীঘ্ৰ আৰক্ষীক সম্পূৰ্ণৰূপে চোৰৰ চক্ৰটোক উৎখাত কৰাৰ বাবে আহ্বান জনায়।
সম্প্ৰতি আটকাধীন আৰ্জিকুৰ ইছলামক আৰক্ষীয়ে জেৰা অব্যাহত ৰাখিছে।