বিশ্বনাথৰ কোঁছগাৱৰ ১৫ নং ৰাষ্ট্ৰীয় ঘাইপথত সংঘটিত হৈছে এক শোকাৱহ দুৰ্ঘটনা।ট্ৰাকৰ চকাৰ তলত সোমাই থিতাতে নিহত হৈছে এজন যুৱক।
স্থানীয় প্ৰত্যক্ষদৰ্শীৰ মতে যুৱকজনে বহু সময় ধৰি আত্মহননৰ চেষ্টা কৰি আছিল।যুৱকজনে প্ৰথমে বিশ্বনাথৰ আউট এজেঞ্চিৰ সমীপত এখন মটৰ চাইকেলৰ সন্মুখত আহি আত্মহনন কৰাৰ চেষ্টা কৰিছিল।তাৰ পিছতে এখন চলন্ত বলেৰ’ গাড়ীৰ সন্মুখত জাপ দিয়াৰ চেষ্টা চলাইছিল যদিও কোনো প্ৰকাৰে বলেৰ’ গাড়ীখনৰ চালকে গাড়ীৰ ব্ৰেক মাৰি যুৱকজনক বচাবলৈ সক্ষম হল।
স্থানীয় লোকে যুৱক জনৰ এই কাণ্ড প্ৰত্যক্ষ কৰি যুৱক জনক সেই স্থানৰ পৰা খেদি পঠিয়ায়। ইয়াৰ পিছতে বিশ্বনাথৰ কোঁছগাৱৰ ১৫ নং ৰাষ্ট্ৰীয় ঘাইপথৰ সমীপত ৰৈ যুৱকজনে এটা প্ৰকাণ্ড ইটা লৈ নিজৰ মুৰত খুন্দিয়াবলৈ ধৰে।
তাৰ পিছতে হঠাৎ ১৫ নং ৰাষ্ট্ৰীয় ঘাইপথৰে আহি থকা এখন ট্ৰাকৰ পিছচকাত নিজৰ মূৰ সোমোৱাই দিয়াৰ ফলত যুৱক জন থিতাতে নিহত হয়। স্থানীয় লোকে মৃত যুৱকজন মানসিক বিকাৰগ্ৰস্থ হোৱাৰ সন্দেহ প্ৰকাশ কৰিছে।
আনহাতে মৃত যুৱকজন এতিয়াও চিনাক্ত হোৱা নাই। ইতিমধ্যে বিশ্বনাথ আৰক্ষীয়ে ঘটনাস্থলীত উপস্হিত হৈ মৃত যুৱক জনৰ মৃতদেহ আৰক্ষী থানাত লৈ যোৱাৰ লগতে দুৰ্ঘটনা সংঘটিত কৰা ট্ৰাকখনো জব্দ কৰে।
পৰবৰ্তী সময়ত আৰক্ষীৰ তদন্ততহে পোহৰলৈ আহিব এই দুৰ্ঘটনাৰ আঁৰৰ প্ৰকৃত ৰহস্য।
