চাইকেলৰে সমগ্ৰ দেশ ভ্ৰমণ কৰি সুদীৰ্ঘ সাত মাহৰ অন্তত পুনৰ নিজ গৃহ চহৰ বিশ্বনাথ উপস্থিত হৈছে দুঃসাহসী চাইকেল আৰোহী ৰুবু কোঁচ।
মাত্ৰ চাইকেলখনকেই সাৰথি কৰি এক দুঃসাহসী যাত্ৰা সমাপ্ত কৰি সাত মাহৰ অন্তত বিশ্বনাথত উপস্হিত হোৱা যুৱক জনক অভিনন্দন জ্ঞাপন কৰিছে আছু আৰু বিশ্বনাথবাসীয়ে।
উল্লেখ্য যে যোৱা ১ জানুৱাৰীত বিশ্বনাথৰ পৰা গড়েহাগী গাঁৱৰ পৰা তিনিজন যুৱকে পৰিবেশ ৰক্ষাৰ সজাগতাৰ বাবে চাইকেল লৈ যাত্ৰা আৰম্ভ কৰিছিল।বিশ্বনাথৰ পৰা তিনিজন যুৱকে যাত্ৰা আৰম্ভ কৰিয়ে প্ৰথমতে উপস্থিত হৈছিল কন্যাকুমাৰীত।
কন্যাকুমাৰীত উপস্থিত হৈয়ে তিনিজন যুৱকৰ ভিতৰত দুজন যুৱকে পুনৰ নিজ গৃহলৈ উভতি আহে।
কিন্তু মনত বান্ধি লোৱা অদম্য সাহসৰে ৰুবু কোঁচ নামৰ যুৱক জনে হাৰ নামানিলে।ৰুবু কোঁচে একক ভাবে পুনৰ নিজ চাইকেলখনকে সাৰথি কৰি কন্যাকুমাৰীৰ পৰা যাত্ৰা কৰিলে গোৱালৈ।
গোৱাৰ পৰা ৰাজস্থান,পুনৰ ৰাজস্থানৰ পৰা হিমাচল প্ৰদেশ,হিমাচল প্ৰদেশৰ পৰা জম্মু কাশ্মীৰ আৰু অৱশেষত জম্মু কাশ্মীৰৰ পৰা অসম ।
আজি বিশ্বনাথত উপস্থিত হল ৰুবু কোঁচ।সুদীৰ্ঘ সাত মাহৰ অন্তত বিশ্বনাথ চাৰিআলিত উপস্থিত হোৱা ৰুবুৰ এই সাফল্যই আনকো অনুপ্ৰাণিত কৰিব।
