ৰাজ্য কঁপাই যোৱা বিশ্বজিৎ হাজৰিকাৰ অপহৰণ আৰু হত্যাকাণ্ডৰ লগত জড়িত ছয়গৰাকী অভিযুক্তক কেইসপ্তাহমান পূৰ্বে গ্ৰেপ্তাৰ কৰিছিল নেলী আৰক্ষীয়ে।
এই গোচৰৰ বৈজ্ঞানিক প্ৰমাণ সংগ্ৰহৰ বাবে আজি ধৃত ছয়গৰাকী অভিযুক্তক ফৰেনছিক লেবলৈ লৈ যোৱা হয় বুলি জানিবলৈ দিছে মহানগৰ আৰক্ষীয়ে।
জানিব পৰা মতে, ভইচ টেষ্টৰ বাবে ফৰেনছিক লেবলৈ লৈ যোৱা হৈছে অভিযুক্ত কেইগৰাকীক। আৰক্ষীয়ে জানিবলৈ দিয়া মতে অতি শীঘ্ৰেই আৰক্ষীয়ে অভিযুক্তৰ বিৰুদ্ধে অভিযোগনামা দাখিল কৰিব।
উল্লেখ্য যে, বিগত বৰ্ষৰ যোৱা ৯ অক্টোবৰত বিশ্বজিৎ হাজৰিকা কৰ্মস্থলীৰ পৰা ৰিক্সাত নিজ বাসস্থানলৈ উভতাৰ সময়তে ছয়মাইল অঞ্চলৰ পৰা অপহৰণ কৰা হৈছিল।
ঘটনাৰ পিছতে অপহৰণ আৰু হত্যাকাণ্ডৰ মাষ্টাৰমাইণ্ড অজয় কলিতাই নিজৰ ফোনটো নলাত পেলাই দিছিল। এই অপহৰণ আৰু হত্যাকাণ্ডৰ গোচৰত ৬ গৰাকী অভিযুক্তক গ্ৰেপ্তাৰ কৰা হৈছিল।
ধৃত অভিযুক্ত কেইগৰাকী আছিল ক্ৰমে দেৱজিত ডেকা, প্ৰণৱ ৰংহাং, সঞ্জয় কুমাৰ ফাগট, পৰেশ ছেত্ৰী, ময়ুৰ নাথ আৰু মাষ্টাৰমাইণ্ড অজয় কলিতা।
সূত্ৰ অনুসৰি বিশ্বজিৎ হাজৰিকাক ২৩ অক্টোবৰত হত্যা কৰা হৈছিল। ২ নৱেম্বৰত এমাহৰ পাছত বিশ্বজিতৰ মৃতদেহ উদ্ধাৰ হয় নগাঁৱৰ নেলী অঞ্চলত।
