অসম-অৰুণাচল সীমান্তত হোৱা প্ৰবল বৰষুণৰ ফলত বিশ্বনাথ জিলাত ভয়াৱহ বানপানীৰ ফলত ৫০০ৰো অধিক পৰিয়াল ক্ষতিগ্ৰস্ত হৈছে। মহাজুলী পথাৰ, মহজুলী বস্তি, টেঙাবাস্তিকে ধৰি বহু গাঁও পানীৰ তলত থকাৰ বাবে মানুহৰ খাদ্য-বাসস্থানৰ অভাবে দেখা দিছে। গাঁওবাসী আৰু ছাত্ৰ-ছাত্ৰীৰ বাবে অতি প্ৰয়োজনীয় চেলাইখাটি আৰু ফুকনছাং সংযোগী এখন কাঠৰ দলং বানপানীয়ে উটুৱাই লৈ যায়, যাৰ ফলত ওচৰৰ কলেজ আৰু চহৰসমূহলৈ যোৱাৰ পথ বিচ্ছিন্ন হৈ পৰে।
ঘৰ, শস্য, শস্যৰ ভাণ্ডাৰ ধ্বংস হোৱাৰ বাবে বাসিন্দাসকলে ব্যাপক সমস্যাত ভুগিছে। বান জৰ্জৰিত গাওঁবাসীয়ে চৰকাৰৰ জৰুৰী সহায়ৰ আহ্বান জনাইছে। চক্ৰ বিষয়া মাধুৰ্য পৰাশৰে ক্ষতিগ্ৰস্ত অঞ্চল পৰিদৰ্শন কৰি সহায়ৰ প্ৰতিশ্ৰুতি দিয়ে। তেওঁ কয় যে অতি সোনকালে সাহায্য সামগ্ৰী দিয়া হ’ব, আৰু পৰিস্থিতি অধিক বেয়া হ’লে অস্থায়ী শিবিৰ স্থাপন কৰা হ’ব। পাভৈ ঘাগোৰা আৰু বুঢ়ী গাং নদীৰ বাঢ়ি অহা পানীয়ে বিশ্বনাথ চহৰতো বাট-পথ প্লাৱিত কৰাৰ লগতে জলজল হোৱাৰ ফলত বাসিন্দাসকলৰ জীৱন কষ্টকৰ হৈ পৰিছে।
