অহা ১১ এপ্ৰিলত লোকসভা নিৰ্বাচনৰ সমান্তৰালকৈ অনুষ্ঠিত হ’ব লগীয়া অৰুণাচল প্ৰদেশ বিধানসভাৰ নিৰ্বাচনৰ বিজেপিৰ দুজন প্ৰাৰ্থী বিনা প্ৰতিদ্বন্দ্বিতাৰে জয়ী হৈছে বুলি আজি দলটোৰ ৰাষ্ট্ৰীয় সাধাৰণ সম্পাদক ৰাম মাধৱে আগতীয়াকৈ ঘোষণা কৰে।
৩১ নং আলং পূব সমষ্টিত কেন্তো জিনি আৰু ১৬ নং য়াচুলি সমষ্টিত এৰ টেবা টাডিৰ (Er Taba Tedir) বিনা প্ৰতিদ্বন্দ্বিতাৰে জয়ী হোৱা বুলি জানিবলৈ দি দলটোৰ ৰাম মাধৱে টুইট কৰে।
“অৰুণাচলৰ পৰাই বিজয়ৰ যাত্ৰা আৰম্ভ”, নিজ দলৰ প্ৰাৰ্থী দুজনৰ জয়ক “আৰম্ভণি” বুলি চিহ্নিত কৰি ৰাষ্ট্ৰীয় সাধাৰণ সম্পাদক ৰাম মাধৱে টুইটটোত কয়।
“Victory March of BJP starts from Arunachal Pradesh: Sir Kento Jini has won (uncontested) from Alo East constituency”
নৰ্থ ইষ্ট নাও-ৰ তৰফৰ পৰা যোগাযোগ কৰাত য়াচুলি জিলা নিৰ্বাচনী বিষয়া চি টাকাৰে বিজেপিৰ এই দাবীক “অসত্য” বুলি কয়। সমষ্টিটোৰ মনোনয়ন পত্ৰ পৰীক্ষাৰ সীমা ২৭ মাৰ্চৰ ১০ বজালৈকে বৃদ্ধি কৰা হৈছে বুলি জনায় বিষয়াজনে।
“এতিয়ালৈকে দুজন প্ৰাৰ্থীয়ে মনোনয়ন পত্ৰ দিছে। এজন বিজেপিৰ আৰু আনজন জে ডি (য়ু)ৰ। মনোনয়ন পত্ৰ পৰীক্ষাৰ সময় কাইলৈ ১০ বজালৈকে বৃদ্ধি কৰা হৈছে। গতিকে চূড়ান্ত সিদ্ধান্ত কাইলৈহে লোৱা হ’ব”, টাকাৰে নৰ্থ-ইষ্ট নাওৰ আগত কয়।
একেদৰে ৩১ নং আলং ইষ্ট বিধানসভা সমষ্টিটোৰ দায়িত্বত থকা জিলা নিৰ্বাচনী বিষয়া স্বতিকা ছাচনে নৰ্থ-ইষ্ট নাওক কয় যে সমষ্টিটোৰ বাবে এতিয়ালৈকে কেৱল এখনহে বৈধ মনোনয়ন পত্ৰ পোৱা গৈছে, যিখন কেন্তো জিনিৰ। কিন্তু আমি এইটো কেৱল ২৮ মাৰ্চৰ ৩ বজাতহে ঘোষণা কৰিব পাৰিম”, বিষয়াগৰাকীয়ে কয়।
জানিব পৰা মতে, আলং পূব সমষ্টিত কংগ্ৰেছৰ মিনকিৰ ললেনেও মনোনয়ন পত্ৰ দাখিল কৰিছিল। আনপিনে, ১৬ নং য়াচুলি সমষ্টিৰ পৰা জে ডি য়ুৰ প্ৰাৰ্থী টকো য়াৰামেও মনোনয় পত্ৰ দাখিল কৰিছিল।
প্ৰাৰ্থী দুজন নিৰ্বাচিত হোৱা বুলি ক’বলৈ যদিও নিৰ্বাচন আয়োগে অস্বীকাৰ কৰিছে, বিজেপিৰ ৰাষ্ট্ৰীয় সাধাৰণ সম্পাদকজনে জয়ী হোৱা বুলি আগতীয়া ঘোষণা কৰাত প্ৰতিক্ৰিয়াৰ সৃষ্টি হৈছে। বিশেষকৈ য়াচুলি সমষ্টিৰ মনোনয়ন পত্ৰ ২৭ মাৰ্চৰ ১০ বজালৈকে বৃদ্ধি কৰা সত্ত্বেও শাসকীয় ৰাষ্ট্ৰীয় দলটোৰ দায়িত্বশীল নেতাজনে আগতীয়া ঘোষণা কৰাটো বিভ্ৰান্তিকৰ।
Victory March of BJP starts from Arunachal Pradesh:
Sir Kento Jini has won (uncontested) from Alo East constituency.— Chowkidar Ram Madhav (@rammadhavbjp) March 26, 2019
ৰাজ্যখনৰ ২০০৯ চনৰ বিধানসভা নিৰ্বাচনতো মুখ্য মন্ত্ৰী দৰ্জী খাণ্ডু আৰু আন ২জন বিধায়ক বিনা প্ৰতিদ্বন্দ্বিতাৰে নিৰ্বাচিত হৈছিল।
