BJP drops about half of 2017 candidates in Gujarat ভাৰতীয় জনতা পাৰ্টীয়ে বৃহস্পতিবাৰে আগন্তুক গুজৰাট বিধানসভা নিৰ্বাচনৰ বাবে প্ৰাৰ্থীৰ প্ৰথমখন তালিকা প্ৰকাশ কৰিছে। এই তালিকাত বিজেপিয়ে ১৬০ জন প্ৰাৰ্থীৰ নাম ঘোষণা কৰিছে। তালিকাত বিজয় ৰূপানি মন্ত্ৰীসভাৰ ১১ জন মন্ত্ৰীকে ধৰি ৬৯ জন বৰ্তমানৰ বিধায়কক টিকট দিয়া হৈছে।
গুজৰাটত বিজেপিয়ে ৩৮ জন নতুন মুখক টিকট দিছে। তেওঁলোকৰ ভিতৰত পাটিদাৰ আন্দোলনৰ নেতা হাৰ্দিক পেটেল আৰু ক্ৰিকেটাৰ ৰবীন্দ্ৰ জাদেজাৰ পত্নী ৰিভাবাকো বিজেপিয়ে টিকট প্ৰদান কৰিছে।
লগতে পঢ়ক: জামিন আবেদন নাকচ; গ্ৰেপ্তাৰ গণধৰ্ষণত অভিযুক্ত আন্দামানৰ প্ৰাক্তন মুখ্য সচিব
তালিকাখনত কেবিনেটত নম্বৰ-২ হিচাপে বিবেচিত ৰাজেন্দ্ৰ ত্ৰিবেদী আৰু মোৰবিৰ বিধায়ক ব্ৰিজেশ মেৰজাই মোৰবি চাচপেনশ্বন দলঙৰ পতনৰ ফল ভুগিব লগা হৈছে। গুজৰাটৰ প্ৰথম গৰাকী মহিলা অধ্যক্ষ নীমা আচাৰ্যকো বিজেপিৰ এই প্ৰথম তালিকাত স্থান দিয়া হোৱা নাই। অৰ্থাৎ তেওঁলোকৰ টিকটো কাটি দিয়া হৈছে।
বিজেপিয়ে প্ৰকাশ কৰা প্ৰাৰ্থীৰ প্ৰথম তালিকাত যোৱা পাঁচ বছৰত কংগ্ৰেছৰ পৰা বিজেপিত যোগদান কৰা ১৯ জন নেতাৰ নাম আছে।
ৰাজ্যিক বিজেপিৰ সভাপতি চি আৰ পাটিলে গুজৰাট নিৰ্বাচনত কেইবাজনো পুৰণি প্ৰাৰ্থীক টিকট প্ৰত্যাখ্যান কৰা প্ৰসংগত কয়, “যদিও বিজেপিয়ে ইয়াৰ মাত্ৰ ২০ জন বিধায়ককহে সলনি কৰে, কিন্তু গণতন্ত্ৰত পৰিৱৰ্তন প্ৰয়োজনীয়, অন্যথা ই স্থবিৰতাৰ সৃষ্টি কৰে। আমি বহু যুৱকক টিকট দিছো আৰু ৩৮ জন বিধায়কক সলনি কৰিছো, এই তালিকাখনে গুজৰাট বিজেপিত এক প্ৰজন্মগত পৰিৱৰ্তন দেখুৱাইছে।”
লগতে পঢ়ক: ৰামদেৱৰ পতঞ্জলিৰ ৫টা ঔষধ বন্ধ কৰাৰ নিৰ্দেশ; কাৰণটো কি?
বিজেপিৰ পুনৰাবৃত্তি নকৰা নীতিৰ আটাইতকৈ ডাঙৰ প্ৰভাৱ দেখা গৈছে আহমেদাবাদত, য’ত ১৬ খন আসনৰ ভিতৰত ১৫ খন আসনৰ বাবে প্ৰাৰ্থীৰ নাম ঘোষণা কৰা হৈছে। ইয়াৰ ভিতৰত আছে মাত্ৰ দুজন বৰ্তমানৰ বিধায়ক আৰু মুখ্যমন্ত্ৰী ভূপেন্দ্ৰ পেটেল। ৱাটৱা আসনৰ প্ৰাৰ্থীৰ নাম এতিয়াও ঘোষণা কৰা হোৱা নাই।
ভাৰতীয় জনতা পাৰ্টীয়ে গুজৰাটৰ ৰাজকোটৰ চাৰিওখন আসনৰ বাবে নতুন প্ৰাৰ্থীক টিকট দিছে। একেদৰে বদোদৰাৰ ৫ খন নগৰীয়া আসনৰ ভিতৰত ৩ খনত প্ৰাৰ্থী সলনি কৰা হৈছে।
