অসমৰ বহু যুৱক শেহতীয়াকৈ আলফা (স্বাঃ)মুখী হোৱা বুলি দাবী কৰি ৰাজ্যত পুনৰ সেনা অভিযান চলিলে তাৰ বাবে শাসনাধিষ্ঠ বিজেপি চৰকাৰেই দায়ী হ’ব বুলি মন্তব্য কৰিছে জ্যেষ্ঠ অধিবক্তা তথা প্ৰব্ৰজনবিৰোধী মঞ্চৰ নেতা উপমন্যু হাজৰিকাই।
“পুনৰ যদি অসমত অপাৰে’চন বজৰং আৰু ৰাইন’ৰ দৰে পৰিস্থিতিৰ সৃষ্টি হয় তাৰ বাবে দায়ী হ’ব চৰকাৰ,” শুকুৰবাৰে এই চিন্তা উদ্ৰেককাৰী মন্তব্য উচ্চতম ন্যায়ালয়ৰ অধিবক্তাজনৰ।
দেৰগাওঁ আছুৰ নেতা পংকজ প্ৰতীম দত্তই বিদ্ৰোহী সংগঠনটোত যোগ দিয়া ঘটনাটো “অশনি সংকেত” বুলিও উল্লেখ কৰিছে হাজৰিকাই।
“কেৱল (আছু নেতা) পংকজেই নহয়, জাগুন, বিশ্বনাথ, ডিগবৈ আৰু তিনিচুকীয়া আদি বহু অঞ্চলৰ যুৱকে আলফা স্বাধীনত যোগদান কৰাৰ খবৰ আমাৰ হাতত আহিছে,” ৰাজ্যৰ আইন-শৃংখলা পৰিস্থিতি বেয়াৰ ফাললৈ ঢাল খোৱাৰ অভিযোগেৰে এই দাবী হাজৰিকাৰ।
খিলঞ্জীয়াৰ সমস্যাসমূহ সমাধান কৰিব বুলি জনসাধাৰণক দেখুওৱা সপোনৰ বিপৰীতে যোৱা আঢ়ৈ বছৰে বিজেপি চৰকাৰখনে গ্ৰহণ কৰা স্থিতিকে ইয়াৰ বাবে মূলতঃ জগৰীয়া কৰিছে হাজৰিকাই।
“নৱ প্ৰজন্মৰ বাবে এইখন চৰকাৰে আশাৰ কিৰণ হৈ আহিছিল– যি খিলঞ্জীয়াৰ অস্তিত্বৰ সমস্যা সম্পূৰ্ণভাৱে সমাধান কৰিব। কিন্তু যোৱা ২৯ মাহত নেতাসকলে বিপৰীত স্থিতি লোৱাৰ কাৰণে সকলো অসমবাসী বিশেষকৈ নৱ প্ৰজন্ম হতাশ হৈছে,” মন্তব্য হাজৰিকাৰ।
শান্তি আলোচনাক লৈ বিভক্ত বিদ্ৰোহী সংগঠনটোৰ সক্ৰিয়তা যোৱা কেইবা দশকজুৰি হ্ৰাস পাইছিল। কিন্তু শেহতীয়াকৈ বিজেপি উত্থাপিত নাগৰিকত্ব বিধেয়কৰ ৰাজ্যজোৰা উত্তাল প্ৰতিবাদৰ মাজত পুনৰ বহু অসমীয়া ডেকা আলফা (স্বাঃ)মুখী হোৱা বুলি হাজৰিকাৰ পূৰ্বেও বিভিন্ন মহলে দাবী কৰি আহিছে।
২৫-৩০ বছৰৰ পিছত এই ঘটনাৰ “পুনৰাবৃত্তি ঘটা দেখা গৈছে” বুলিও মন্তব্য কৰি হাজৰিকাই কয় যে বিগত সময়তো চৰকাৰৰ কাৰুকাৰ্য্যত অসন্তুষ্ট হৈ যুৱচামে আলফাত যোগদান কৰিছিল।
শাসনাধিষ্ঠ বিজেপিৰ লগতে কংগ্ৰেছ, অগপকে ধৰি কোনো ৰাজনৈতিক দলেই খিলঞ্জীয়াৰ লগত নাই বুলি দাবী কৰি তেওঁ কয়, “নেতাৰ প্ৰৱঞ্চনা আৰু বিফলতাৰ কাৰণে নৱ প্ৰজন্মই গণতান্ত্ৰিক ব্যৱস্থাৰ ওপৰত বিশ্বাস হেৰুৱাইছে। বৰ্তমান কোনো নেতা খিলঞ্জীয়াৰ পক্ষত নাই, কোনোবা যদি মুছলিম প্ৰব্ৰজনকাৰীৰ পক্ষত, আন কোনো আকৌ হিন্দু প্ৰব্ৰজনকাৰীৰ পক্ষত।”
