আগন্তুক লোকসভা নিৰ্বাচনক লৈ ভাৰতীয় জনতা পাৰ্টীয়ে বিভিন্ন ঠাইত নিৰ্বাচনী প্ৰচাৰ চলোৱাৰ সময়তে আক্ৰাছুৱে ‘বিজেপি হটাও জনগোষ্ঠী বচাও’ শীৰ্ষক অভিযানেৰে বিজেপিৰ বিৰুদ্ধে একপ্ৰকাৰৰ কঁকালত টঙালি বান্ধিছে। এই কথা সংগঠনটোৱে এক প্ৰেছ বিবৃতিৰ জৰিয়তে জানিবলৈ দিয়ে।
বিবৃতিটোত উল্লেখ কৰা অনুসৰি ২৭ মাৰ্চত সদৌ কোচ ৰাজবংশী ছাত্ৰ সন্থা আৰু কোচ ৰাজবংশী সন্মিলনীৰ এক যুটীয়া কাৰ্যনিৰ্বাহক সভা অনুষ্ঠিত হৈ যায়।
এই সভাতে বিজেপি দলে কোচ ৰাজবংশী জনগোষ্ঠীক কৰা চমৰ প্ৰতাৰণাৰ কথা উল্লেখ কৰি ক্ষোভ উজাৰে। আৰু সভাতে সৰ্বসন্মতিক্ৰমে আগন্তুক লোকসভা নিৰ্বাচনত বিজেপি দলক উচিত প্ৰত্যুত্তৰ দিয়াৰ উদ্দেশ্যে ‘বিজেপি হটাও জনগোষ্ঠী বচাও’ শীৰ্ষক এক অভিযান সমগ্ৰ অসমতে ৰূপায়ণ কৰাৰ সিদ্ধান্ত গ্ৰহণ কৰে।
এই অভিযানৰ জৰিয়তে জনজাগৰণ সভা অনুষ্ঠিত কৰি বিজেপিয়ে কৰা প্ৰতাৰণা ৰাইজৰ মাজত প্ৰচাৰ কৰি ৰাইজক বিজেপিক ভোট নিদিবৰ বাবে আহ্বান জনাব।
এই অভিযানৰ অংশ হিচাপে অহা ২ এপ্ৰিলত প্ৰথমে ওদালগুৰি জিলাৰ ৰৌতা চাৰিআলিত অভিযানটি শুভাৰম্ভ কৰাৰ লগতে পৰৱৰ্তী সময়ত ৰাজ্যৰ বিভিন্ত প্ৰান্তলৈ এই অভিযান আগবঢ়াই নিব বুলি বিবৃতিযোগে সংগঠনটোৱে জানিবলৈ দিয়ে।
