খিলঞ্জীয়াৰ ভূমিৰ অধিকাৰ সুনিশ্চিত কৰাৰ ক্ষেত্ৰত দিয়া প্ৰতিশ্ৰুতি ৰক্ষা কৰি শুকুৰবাৰে বিশ্বনাথৰ বিহালী খণ্ড উন্নয়ন বিষয়াৰ কাৰ্য্যালয়ত অনুষ্ঠিত এক সভাত ৫৩৮ গৰাকী ভূমিহীন লোকক মাটিৰ পট্টা প্ৰদান কৰা হয়।
মাটিৰ পট্টা প্ৰদান অনুষ্ঠানত উপস্থিত থাকি অসম চৰকাৰৰ জ্যেষ্ঠ মন্ত্ৰী ৰঞ্জিত দত্তই অহা মাৰ্চ মাহৰ ভিতৰত জিলাখনৰ আন আন ভূমিহীন লোক সকলকো ভূমি পট্টা প্ৰদান কৰা হ’ব বুলি ঘোষণা কৰে।
আনহাতে, যোগ্য হিতাধিকাৰীসকলক ভূমি পট্টা প্ৰদান কৰাৰ লগতে চৰকাৰী ভূমিসমূহ শীঘ্ৰে বেদখলমুক্ত কৰাৰ বাবেও ব্যৱস্থা গ্ৰহণ কৰা হ’ব বুলি ঘোষণা কৰে মন্ত্ৰী গৰাকীয়ে।
তদুপৰি, আৱন্টনপ্ৰাপ্ত ভূমিসমূহ কোনো কাৰণতে দখল অথবা হস্তান্তৰ নকৰিবলৈ হিতাধিকাৰী সকলক মন্ত্ৰীগৰাকীয়ে আহ্বান জনায়।
ভূমি পট্টা প্ৰদান অনুষ্ঠানত বিশ্বনাথৰ ৰাজহ চক্ৰ বিষয়া, জিলা পৰিষদৰ সদস্য, আঞ্চলিক আৰু গাওঁ পঞ্চায়তৰ প্ৰতিনিধিসকলো উপস্থিত থাকে।
ৰঞ্জিত দত্তই সভাত ভাষণ প্ৰদান কৰি ৰাজ্যৰ সৰ্বানন্দ সোণোৱাল নেতৃত্বাধীন বিজেপি চৰকাৰে অসমৰ খিলঞ্জীয়া জনসাধাৰণৰ উন্নয়নৰ বাবে নিৰন্তৰ প্ৰচেষ্টা গ্ৰহণ কৰি আহিছে বুলিও কয়।
