ৰাজ্যত দ্বিতীয় পৰ্য্যায়ৰ নিৰ্বাচনৰ ভোটগ্ৰহণলৈ মাজত মাথো কেইটামান দিন বাকী থকা অৱস্থাত বিভিন্ন দল সমূহে প্ৰচাৰ অভিযান তীব্ৰতৰ কৰি তুলিছে। আজি অসমত প্ৰচাৰ চলাবৰ বাবে উপস্থিত হৈছে বিজেপিৰ জনপ্ৰিয় নেত্ৰী তথা অভিনেত্ৰী ৰূপা গাংগুলী।
খবৰ অনুসৰি ৰূপা গাংগুলীয়ে লামডিং, শিলচৰ, কৰিমগঞ্জ আৰু হাইলাকান্দিত চাৰিখন নিৰ্বাচনী সভাত অংশগ্ৰহণ কৰি বিজেপিৰ প্ৰাৰ্থী ৰূপক শৰ্মা, কৃপানাথ মাল্লা আৰু ডা০ ৰাজদীপ ৰয়ৰ হৈ নিৰ্বাচনী প্ৰচাৰ চলাব।
মহাভাৰতত দ্ৰোপদীৰ চৰিত্ৰ ৰূপায়ন কৰি জনপ্ৰিয় হোৱা ৰূপা গাংগুলীয়ে ২০১৫ চনত বিজেপিত যোগদান কৰিছিল।২০১৬ চনৰ পশ্চিম বংগ বিধান সভা নিৰ্বাচনত ৰূপা গাংগুলীয়ে ত্ৰিণামূল কংগ্ৰেছৰ প্ৰাৰ্থী প্ৰাক্তন ৰঞ্জী ক্ৰিকেটাৰ লক্ষ্মী ৰতন শুক্লাৰ হাতত পৰাজিত হৈছিল।
আনহাতে, ২০১৬ চনত তেওঁ ক্ৰিকেটাৰ নৱজ্যিত সিং সিদ্ধুই পদত্যাগ কৰাৰ ফলত খালী হোৱা পদটোৰ বাবে ৰাজ্যসভালৈ নিৰ্বাচিত হয় গাংগুলী।
অসম বিজেপিৰ প্ৰতিনিধিসকলে ইতিমধ্যে ৰূপা গাংগুলীৰ নিৰ্বাচনী সভাৰ প্ৰস্তুতি সম্পুৰ্ণ কৰিছে। বাংলাত সুন্দৰ ভাষণ দিব পৰা দক্ষতা থকা ৰূপা গাংগুলীৰ ভাষণে বৰাক উপত্যকাৰ ভোটাৰক আকৰ্ষণ কৰিবলৈ সক্ষম বুলি আশা কৰা হৈছে।
