সদ্যসমাপ্ত লোকসভা নিৰ্বাচনত কংগ্ৰেছৰ দুৰ্গ খ্যাত আমেথি সমষ্টিত কংগ্ৰেছৰ ৰাষ্ট্ৰীয় সভাপতি ৰাহুল গান্ধীক পৰাস্ত কৰা বিজেপিৰ জনপ্ৰিয় নেত্ৰী স্মৃতি জুবিন ইৰাণী আজি মা কামাখ্যাৰ আশিস লোৱাৰ বাবে গুৱাহাটীত উপস্থিত হয়।
ইণ্ডিগ’ বিমানেৰে মুম্বাইৰ ছ্ত্ৰপতি শিৱাজী আন্তঃৰাষ্ট্ৰীয় বিমান বন্দৰৰ পৰা গুৱাহাটীৰ বৰঝাৰ স্থিত গোপীনাথ বৰদলৈ আন্তঃৰাষ্ট্ৰীয় বিমান বন্দৰত উপস্থিত হোৱা স্মৃতি ইৰাণীয়ে বিমানবন্দৰৰ পৰা পোনে পোনে মা কামাখ্যাৰ আশিস লোৱাৰ উদ্দেশ্যে নীলাচল পাহাৰত থকা কামাখ্যা দেৱালয়ত উপস্থিত হয়।
শক্তিপীঠত উপস্থিত হৈ স্মৃতি ইৰাণীয়ে বগলা মন্দিৰত পূজা-অৰ্চনা কৰি দেৱীৰ আশীৰ্বাদ গ্ৰহণ কৰে।
আনহাতে, কামখ্যা মন্দিৰ দৰ্শন কৰি পুনৰ আজিয়ে মুম্বাইলৈ উৰা মাৰিব বিজেপিৰ ৰাষ্ট্ৰীয় নেতৃগৰাকী। নিৰ্বাচনৰ পূৰ্বেও ইৰাণী গুৱাহাটীলৈ অহাৰ সময়ত কামাখ্যা মন্দিৰ দৰ্শন কৰিছিল।
আজি বিজেপি নেতৃগৰাকীৰ অসম ভ্ৰমণৰ সময়ত কোনো ধৰণৰ দলীয় সংবাদমেল সম্বোধন কৰাৰ সম্ভাৱনা নাই। এয়া তেওঁৰ সম্পূৰ্ণ ব্যক্তিগত ভ্ৰমণ বুলি খবৰ লাভ কৰা গৈছে।
উল্লেখযোগ্য যে, ৩০ মে’ত শপত গ্ৰহণ কৰিবলগীয়া নতুন মোদী কেবিনেটত স্মৃতি ইৰাণীয়ে স্থান পোৱাৰ পূৰ্ণ সম্ভাৱনা আছে। মোদী কেবিনেটৰ শেষৰফালে তেওঁ টেক্সটাইল মন্ত্ৰী হিচাপে কাৰ্য্যভাৰ পালন কৰিছিল।
