‘অসমত বিজেপি দলে ১০ খন আসন লাভ কৰিব আৰু উত্তৰ-পূবত ১৮ ৰ পৰা ২০ খন আসন লাভ কৰিব।’ এই মন্তব্য নেডাৰ আহ্বায়ক হিমন্ত বিশ্ব শৰ্মাৰ। শনিবাৰে অৰ্থাৎ ২৩ মাৰ্চত যোৰহাট আৰু শিৱসাগৰ বিধানসভা সমষ্টিৰ বিজেপি আৰু এজিপিৰ বিধায়ক সকলৰ লগত এক বৈঠকত অংশ গ্ৰহণ কৰি এই মন্তব্য কৰে।
আনহাতে বৈঠকৰ অন্তত সাংবাদিকেৰে হোৱা কথাবতৰাত বৰ্তমানৰ যোৰহাট লোকসভা সমষ্টিৰ সাংসদ কামাখ্যা প্ৰসাদ তাচাৰ সন্দৰ্ভত সোধা প্ৰশ্নৰ উত্তৰত মন্ত্ৰী গৰাকীয়ে কয়, ‘কামাখ্যা প্ৰসাদ তাছাক লোকসভা সাংসদতকৈ বলিষ্ঠ ৰূপত দেখা পোৱা যাব। অহা জুন মাহৰ ভিতৰত এতিয়াতকৈ বলিষ্ঠ, উজ্জ্বল, দায়িত্বশীল আৰু প্ৰভাৱশালী ৰূপত দেখা যাব কামাখ্যা প্ৰসাদ তাছাক।’
তাৰোপৰি মন্ত্ৰী হিমন্তই কংগ্ৰেছক ক্ষুৰধাৰ সমালোচনা কৰি কয় যে, ‘এইবাৰ লোকসভা নিৰ্বাচনত কংগ্ৰেছ কোনো মূল ইচ্ছ্যু নাই। কংগ্ৰেছৰ ইচ্ছ্যু হৈছে তুষ্টিকৰণ, আজমলক অসমখন গটাই দিয়া। কংগ্ৰেছৰ ইচ্ছ্যু হল আজি অসমৰ বিস্তৃৰ্ণ অঞ্চলত অসমীয়া মানুহৰ ভেটি মাটি উচন হ’ল, ঠিক সেই ব্যৱস্থা সকলোতে আগবঢ়াব লাগে। নাগৰিকত্ব বিল পোৱাৰ আগতে অসমৰ জনগণে প্ৰশ্ন কৰিব যে কাজিৰঙাৰ পৰা অবৈধ বাংলাদেশীক কিয় উচ্চেদ নকৰিলে, বটদ্ৰৱা সত্ৰত কিয় বেদখল উচ্চেদ কৰিবলৈ সাহস হোৱা নাছিল। গতিকে কংগ্ৰেছৰ কোনো, ইচ্ছ্যু নাই। এটা বংশবাদী দল।’
