তিনিচুকীয়াত নদিহিং নৈত ভয়াবহ নাও দুৰ্ঘটনা; তিনিগৰাকী যাত্ৰী সন্ধানহীন
উজনি অসমৰ তিনিচুকীয়া জিলাৰ কাকপথাৰত নদিহিং নৈত বৃহস্পতিবাৰে সংঘটিত হোৱা ভয়াবহ নাও দুৰ্ঘটনাত পাঁচগৰাকী লোকক উদ্ধাৰকাৰ হৈছে যদিও এতিয়াও তিনিগৰাকী লোক সন্ধানহীন হৈ আছে।
ঘটনাৰ বিবৰণী অনুসৰি, বৃহস্পতিবাৰে ন-দিহিং নৈত আঠগৰাকী যাত্ৰী নাওৰে যাত্ৰা কৰি থকাৰ সময়তে নৈৰ মাজ ভাগত সন্মুখিন হোৱ ভয়ংকৰ ধুমুহাত নাওখন দুৰ্ঘটনাগ্ৰস্ত হয়। ভয়াবহ দুৰ্ঘটনাটোত পানীত পৰি যোৱা যাত্ৰীসকলৰ কিছুসংখ্যকে সাতুৰি পাৰলৈ আহে আৰু কিছুমানক স্থানীয় লোকে উদ্ধাৰ কৰে।
আনহাতে, দুৰ্ঘটনাটোত এহাল দম্পতীকে ধৰি তিনিগৰাকী লোক নদীৰ প্ৰবল সোতত উটি যায়। সন্ধানহীন হৈ থকা লোককেইগৰাকী হ’ল- মালভোগ গাঁৱৰ শংকৰ গুঞ্জু আৰু ফুলমতী গুঞ্জু, কচুদুব গাঁৱৰ ভাইয়া গোৱালা।
অসম দুৰ্যোগ ব্যৱস্থাপনা বাহিনীৰ উদ্ধাৰকাৰী দলে সন্ধানহীন হৈ থকা লোকসকলক বিচাৰি অভিযান চলাই আছে।
এচ ডি আৰ এফৰ এজন বিষয়াই কয় ‘‘আমি স্থানীয় উদ্ধাৰকাৰী দলৰ সৈতে লগ লাগি উদ্ধাৰ অভিযান অব্যাহত ৰাখিছো যদিও এতিয়ালৈ সন্ধানহীন হৈ থকা লোককেইগৰাকীৰ সন্ধান লাভ কৰিব পৰা নাই। আমি আমাৰ অভিযান অব্যাহত ৰাখিম’’।
তদুপৰি এচ ডি আৰ এফৰ বিষয়াগৰাকীয়ে স্থানীয় লোকসকলক প্ৰবল সোতৰ বাবে নৈৰ কাষলৈ আহিবলৈ মানা কৰি সুৰক্ষিত হৈ থকাৰ বাবে আহ্বান জনাই।