গুৱাহাটী মহানগৰীৰ বৰবাৰী অঞ্চলৰ আয়কৰ আৱাসৰ সন্মুখত দেওবাৰে ৰাতিপুৱা এজন যুৱকৰ মৃতদেহ উদ্ধাৰ হোৱা ঘটনাই চাঞ্চল্যৰ সৃষ্টি কৰিছে।
দিচপুৰ আৰক্ষীৰ থানাৰ আৰক্ষী বিষয়া ধৰ্মেশ্বৰ নাথৰ নেতৃত্বত আৰক্ষীৰ এটা দল ঘটনাস্থলীত উপস্থিত হৈ তদন্ত আৰম্ভ কৰিছে। যুৱকজনৰ দুয়োখন হাততে টাটু কৰাৰ লগতে বাওঁহাতৰ আঙুলিত দুটা আঙুঠি পিন্ধি থকা দেখা গৈছে।
যুৱকজনৰ মৃতদেহটো ভিআইপি পথৰ অস্থায়ী দোকান ঘৰৰ বাঁহৰ চাঙত পৰি থকা অৱস্থাত উদ্ধাৰ কৰা হয়।
স্থানীয় এজন লোকে প্ৰথমতে যুৱকজনক হেঙেৰাবাৰীৰ লিচু বাগানৰ বিক্ৰম ৰাভা বুলি চিনাক্ত কৰে। ইয়াৰ পাছতে আৰক্ষীৰ দলটো পৰৱৰ্তী অনুসন্ধানৰ বাবে লিচু বাগানলৈ ৰাওনা হয় আৰু পৰিয়ালৰ লোকক সাক্ষাৎ কৰে।
স্থানীয় লোকে জানিব দিয়া মতে যুৱকজনক বেছিভাগ সময়েই বৰবাৰীত দেখা পোৱা যায়। আৰক্ষীৰ প্ৰাথমিক অনুসন্ধান অনুসৰি অত্যধিক দ্ৰাগছ সেৱনৰ ফলতে যুৱকজনৰ মৃত্যু হোৱাৰ সন্দেহ কৰা হৈছে।
যুৱকজনৰ মৃতদেহৰ বাঁওভৰিৰ আঙুলিত সামান্য আঘাতৰ বাহিৰে আন ঠাইত কোনো আঘাতৰ চিন দেখা যোৱা নাই।
আনহাতে, মহানগৰ আৰক্ষীৰ এচিপি হিমাংশু দাস অনুসন্ধানৰ বাবে ঘটনাস্থলীত উপস্থিত হয়।
মৃত যুৱক বিক্ৰম ৰাভাৰ পিতৃ গিৰিন্দ্ৰ ৰাভা পেছাত এগৰাকী অটো চালক বুলি জানিব পৰা গৈছে। পুত্ৰৰ মৃত্যু সম্পৰ্কত পিতৃ গিৰিন্দ্ৰ ৰাভাই আক্ষেপেৰে কয়, ‘’দ্ৰাগছ খাই মৰিছে আৰু কি ক’ম।‘’
