হেইমনমি ছাইনাহে আজিৰ পৰা ২০ বছৰ আগতে দুয়োখন হাত নোহোৱাকৈয়ে জন্মগ্ৰহণ কৰিছিল।
পৰিয়ালৰ কোনোৱে কেতিয়াও আশা কৰা নাছিল যে হেইমনমিয়ে স্কুললৈ যাব পৰিব বা লিখিবলৈ সক্ষম হ’ব।
কিন্তু দিব্যাংগগৰাকীৰ একাগ্ৰতা আৰু কঠোৰ পৰিশ্ৰমে তেওঁক এনে এক সফলতা আনি দিলে যিটো আছিল সম্পূৰ্ণ অসম্ভৱ।
পশ্চিম জয়ন্তীয়া পাহাৰ জিলাৰ মৌকাইয়’ৰ ছয়ংগোধ হায়াৰ ছেকেণ্ডেৰী স্কুলৰ এগৰাকী ছাত্ৰ হেইমনমিয়ে এইবাৰ তেওঁৰ মাধ্যমিক শিক্ষান্ত পৰীক্ষাত (SSLC)অৱতীৰ্ণ হৈছে।
পৰীক্ষা কেন্দ্ৰত সকলোৱে হতচকিত হৈ পৰিছিল যেতিয়া তেওঁলোকে দেখিছিল যে ছাত্ৰগৰাকীয়ে তেওঁৰ সোঁভৰিৰে কলমটো ধৰি দৃঢ়তাৰে লিখি গৈছে।
হেইমনমিক তেওঁৰ বাওঁভৰিৰে প্ৰশ্নকাকত আৰু উত্তৰ বহী ধৰি থকা আৰু সোঁভৰিৰ আঙুলিৰে মসৃনভাৱে লিখি যোৱা দেখা গৈছিল।
‘’এইটো মোৰ জীৱনৰ আটাইতকৈ আনন্দৰ মুহূৰ্ত। আমি কেতিয়াও তেওঁৰ পৰা ইমান বেছি আশা কৰা নাছিলো,’’-হেইমনমিৰ গৰ্বিত মাতৃ এইমাইয়া ছাইনাহে কয়।
হেইমনমিৰ পিতৃ বিনেইন লামাৰে এগৰাকী খেতিয়ক আৰু তেওঁৰ পৰিয়ালটো দক্ষিণ জয়ন্তীয়া পাহাৰ জিলাৰ লাছকেইন গাঁৱৰ পৰা অহা।
‘’আমি হেইমনমিয়ে এছএছএলচি পৰীক্ষাত ইমান আত্মপ্ৰত্যয়েৰে অৱতীৰ্ণ হোৱাত আনন্দিত হৈছো,’’-মেঘালয় মাধ্যমিক শিক্ষা পৰিষদৰ পৰীক্ষা নিয়ন্ত্ৰক টাম্মি ৰয় লালুৱে কয়।
হেইমনমিৰ পিতৃ-মাতৃ এতিয়া তেওঁলোকৰ সন্তানটোৰ উচ্চ শিক্ষাৰ বাবে ধন যোগান ধৰিবলৈ যৎপৰোনাস্তি চেষ্টা চলাবলৈ দৃঢ়প্ৰতিজ্ঞ যাতে জীৱনত তেওঁ ভালদৰে প্ৰতিষ্ঠিত হ’ব পাৰে।
‘’আমি ভগবানৰ ওচৰত প্ৰাৰ্থনা জনাও যাতে তেওঁ (হেইমনমি) এদিন এজন ডাঙৰ মানুহ হ’ব পাৰে আৰু আমাক গৌৰৱান্বিত কৰি তোলে,’’- এইমাইয়া ছাইনাহে কয়।
তেওঁ কয়, হেইমনমিয়ে সদায় এগৰাকী চিকিৎসক হোৱাৰ সপোন দেখে। ‘’মই তেওঁৰ সপোন বাস্তৱ হোৱাৰ আশা কৰিছো,’’-তেওঁ কয়।
হেইমনমিৰ স্কুলৰ বন্ধুসকলো আশাবাদী যে তেওঁ অতি সুখ্যাতিৰে এছএছএলচি পৰীক্ষাত উত্তীৰ্ণ হ’ব।
‘’তেওঁ (হেইমনমি) এগৰাকী একাগ্ৰতা থকা ছাত্ৰ আৰু আমি নিশ্চিত যে তেওঁ ডিষ্টিংশ্যনসহ এছএছএলচি পৰীক্ষাত উত্তীৰ্ণ হ’ব,’’-স্কুলখনৰ এগৰাকী ছাত্ৰ মিহছালানে কয়।
হেইমনমিৰ পিতৃ-মাতৃ আশাবাদী যে যদি ল’ৰাটোৱে এছএছএলচি পৰীক্ষাত উত্তীৰ্ণ হয়, মেঘালয় চৰকাৰেও আগবাঢ়ি আহিব আৰু তেওঁক চিকিৎসক হোৱাত সহায় কৰিব।
