ৰাজ্যত ক’ভিডৰ সক্ৰমণ হ্ৰাস পাইছে যদিও বিগত এটা সপ্তাহত বোকাখাতত ক’ভিডৰ সংক্ৰমণ অনিয়ন্ত্ৰিত হৈ পৰিছে ৷ প্ৰতিদিনে সংক্ৰমিত ৰোগীৰ সংখ্যা বৃদ্ধি পাইছে ৷
বৃহস্পতি বাৰৰ দিনা বোকাখাতত মুঠ ১০০ জন লোকৰ শৰীৰত ক’ভিডৰ সংক্ৰমণ ধৰা পৰিছে ৷ বুধবাৰৰ দিনা এই সংখ্যা আছিল ৬৮ জন ৷
তাৰ মাজতে কাজিৰঙাৰ ম’হপৰা গাওঁত ভয়াৱহ ক’ভিড সংক্ৰমণে প্ৰাণ ল’লে পিতা পুত্ৰৰ ৷
গাঁওখনৰ নিৱাসী উমেশ গগৈ আৰু তেওঁৰ পুত্ৰ সঞ্জয় গগৈ ক’ভিড-১৯ত আক্ৰান্ত হৈ চিকিৎসাধীন হৈছিল ৷ চিকিৎসাৰ অন্তত হোৱা পৰীক্ষাত সঞ্জীৱ গগৈ ক’ভিড সংক্ৰমণৰ পৰা মুক্ত হৈছিল আৰু ক’ভিড টেষ্টত ফলাফল নিগেটিভ আহিছিল ৷ কিন্তু ক’ভিড মুক্ত হৈও মঙলবাৰে নিশা সঞ্জীৱ গগৈয়ে মৃত্যুক আঁকোৱালি লয় ৷
জানিব পৰা মতে, মধ্য কাজিৰঙা গাঁও পঞ্চায়তৰ অধীনৰ ম’হপৰা গাঁও নিৱাসী তথা উদীয়মান যুৱক সঞ্জয় গগৈক ক’ভিড নিগেটিভ হোৱাৰ পাছত বোকাখাত চিকিৎসালয়ৰ পৰা গুৱাহাটীলৈ উন্নত চিকিৎসাৰ বাবে নি থকা অৱস্থাত মঙলবাৰে নিশা প্ৰায় ১-৩০ বজাত নগাওঁৰ আমনিত মৃত্যু হয়।
ইফালে পুত্ৰৰ অকাল মৃত্যুৰ পিছতে ক’ভিড আক্ৰান্ত হৈ যোৰহাটত চিকিৎসাধীন হৈ থকা সঞ্জীৱ গগৈৰ পিতৃ উমেশ গগৈৰো চিকিৎসাধীন অৱস্থাতে বুধবাৰে নিশা মৃত্যু হয়। পিতা-পুত্ৰৰ মৃত্যুত সমগ্র কাজিৰঙা অঞ্চলতে এতিয়া শোকৰ ছাঁ পৰিছে।
