বিপিএফ দলৰ মনোনীত প্ৰাৰ্থী ৰংজা খুংগুৰ বসুমতাৰীয়ে গেৰুৱা বসন পিন্ধাৰ পিছত নাটকীয় পট পৰিৱৰ্তন ঘটা ৫৮ নং তামুলপুৰ বিধানসভা সমষ্টিটো উদ্ধাৰ কৰাৰ স্বাৰ্থত উঠি-পৰি লাগিছে বিপিএফ দল।
প্ৰাৰ্থী নাথাকিলেও নিজৰ দলীয় প্ৰতীক লৈ অহা ৬ এপ্ৰিলত অনুষ্ঠিতব্য তৃতীয় পৰ্যায়ৰ নিৰ্বাচনত দলক জিকাই নিয়াৰ বাবে আপ্ৰাণ প্ৰচেষ্টা অব্যাহত ৰাখিছে দলটোৱে। ইয়াৰ অংশস্বৰূপে আজি তামুলপুৰ বিধানসভা সমষ্টিৰ অন্তগর্ত বাঙালীপাৰা হাইস্কুল খেলপথাৰত অনুষ্ঠিত এক বিশাল নিৰ্বাচনী সভাত হেলিকাপ্টাৰ লৈ প্ৰচাৰ চলাবলৈ উপস্থিত হল বিপিএফৰ মুৰব্বী হাগ্ৰামা মহিলাৰী।
অসম প্ৰদেশ কংগ্ৰেছ সমিটিৰ সাধাৰণ সম্পাদক অপূৰ্ব কুমাৰ ভট্টাচাৰ্য্যক লগত লৈ বিশাল নিৰ্বাচনী সভাত উপস্থিত ৰাইজক সম্বোধি হাগ্ৰামা মহিলাৰী একালৰ মিত্ৰদল বিজেপিৰ বিৰুদ্ধে সৰৱ হৈ পৰে। নিজ স্বভাৱ সূলভ ভাষণত তেওঁ কয়— ‘”তামুলপুৰ সমষ্টিৰ প্ৰক্ষেপিত প্ৰাৰ্থী ৰংজা খুংগুৰ বসুমতাৰীক হাইজেক কৰি বিজেপিয়ে স্বৈৰাচাৰী শাসন তথা গণতন্ত্ৰক হত্যা কিৰিছে। প্ৰাৰ্থী নহ’লেও তামুলপুৰ সমষ্টিৰ ৰাইজৰ দ্বায়িত্ব আজিৰে পৰা মোৰ।”
বিভিন্ন সমস্যা তথা জাতি-জনগোষ্ঠীৰ সমস্যাক আগুৱাই লৈ যোৱাৰ দ্বায়িত্ব বিপিএফৰ। বিটিচিৰ প্ৰাক্তন কাৰ্যবাহী সদস্য মহেশ্বৰ বসুমতাৰীৰ সঞ্চালনাত অনুষ্ঠিত সভাত মহিলাৰীয়ে পুণৰ কয় — পৰাজয়ৰ আশংকাত সমগ্ৰ অসমতে বিজেপি দল এতিয়া শংকিত হৈছে। বিজেপি দলে পৰাজয়ৰ আশংকাত ভুগি প্ৰাৰ্থী হাইজেক কৰাকে ধৰি বিভিন্ন হিংসাত্মক ঘটনাত লিপ্ত হৈছে। বিজেপিৰ সভাপতি ৰঞ্জিত দাসে পৰাজয়ৰ আগতীয়া উমান পাই সৰভোগ সমষ্টি এৰি পলোৱা বুলিও তীৰ্যক মন্তব্য কৰি বিজেপিৰ যিমান ডাঙৰ নেতা নামিলেও মহাজোঁটৰ চৰকাৰ গঠন কৰাত কোনেও বাধা দিব নোৱাৰে বুলি উল্লেখ কৰে।
ইফালে বিপিএফ দল যাৰ সৈতে থাকিব অসমত সেই দলৰে চৰকাৰ হ’ব বুলি দাবী কৰি ৰাজ্যত মহাজোঁট চৰকাৰ গঠন হ’লে বিটিচিতো বিপিএফৰ চৰকাৰ হ’ব বুলি দৃঢ়তাৰে মন্তব্য কৰে হাগ্ৰামা মহিলাৰীয়ে। আনহাতে পৰাজয়ৰ আগতীয়া উমান পায়েই ইউপিপিএল দলৰ বহুকেইগৰাকী পাৰিষদে মহিলাৰীৰ সৈতে যোগাযোগ অব্যাহত ৰখা বুলি বিস্ফোৰক মন্তব্য আগবঢ়াই প্ৰমোদ বড়ো চৰকাৰে কাম নকৰাকৈ ঠিকাদাৰৰ বিল মোকলাই দিয়াৰ অভিযোগ উত্থাপন কৰে।
সভাত ভাষণ দি কংগ্ৰেছৰ সাধাৰণ সম্পাদক অপূৰ্ব কুমাৰ ভট্টাচাৰ্যই কয় যে এইবাৰ নিৰ্বাচনত বিপিএফৰ সকলো কেইগৰাকী জয় লাভ কৰিব। তেওঁ পুনৰ কয় যে বিজেপিয়ে দেশৰ ৰাইজক ফাঁকিৰ পিছত ফাঁকি দি ৰাজনীতি কৰি আহিছে।
আনহাতে সাংবাদিকেৰে হোৱা বাৰ্তালাপত বিদ্ৰোহী নেতা এম বাথা সন্দৰ্ভত অজ্ঞতা প্ৰকাশ কৰি হাগ্ৰামা মহিলাৰীয়ে হিমন্ত বিশ্ব শৰ্মাক জনজাতি বিৰোধী আখ্যা দিয়ে।
মহিলাৰীয়ে সাংবাদিকৰ আগত কয়— “নাঙলক মিউজিয়ামত ৰাখিম বুলি কোৱা হিমন্তক ঢাকাৰ মিউজিয়ামত থোৱা হ’ব। বিটিচিত প্ৰধানমন্ত্ৰী আহিলেও মাত্ৰ প্ৰতিশ্ৰুতি প্ৰদান কৰিহে যায়।”
সভাত প্ৰাক্তন কাৰ্যবাহী সদস্য গণেশ কছাৰী, এমচিএলএ বিজিৎ গৌৰা নাৰ্জাৰী, কৌতুক অভিনেতা বিপুল ৰাভা, কংগ্ৰেছৰ জ্যেষ্ঠ নেতা মিত্ৰলাল শৰ্মা, কনক বসুমতাৰী, চিপিআই(এম) নেতা দূৰ্গা পৌড়েল, জমিয়ত ই উলেমা হিন্দৰ বাক্সা জিলাৰ সভাপতি জাকিৰ হুছেইন, শৰণীয়া কছাৰী উন্নয়ণ পৰিষদৰ প্ৰাক্তন অধ্যক্ষ দীপক ডেকা, যুৱ বিপিএফৰ সাধাৰণ সম্পাদক শৰৎ চন্দ্ৰ দাস, মহিলা মৰ্চা বিপিএফৰ নেত্ৰী চন্দ্ৰকলা ব্ৰহ্ম আদিকে ধৰি বহুকেইগৰাকী নেতা-কৰ্মী সভাত উপস্থিত থাকে।
