ৰাজনীতি আৰু কূটনীতিৰ ক্ষেত্ৰখনত বি পি এফ প্ৰথমস্থানত আছে বুলি আজি গুৰুত্বপূৰ্ণ মন্তব্য কৰিছে কোকৰাঝাৰৰ সাংসদ নৱ শৰণীয়াই। দিচপুৰ লাষ্টগেটত অবড়ো সুৰক্ষা সমিতিৰ উদ্যোগত অনুষ্ঠিত প্ৰতিবাদত অংশগ্ৰহণ কৰি আমাৰ সাংবাদিকৰ আগত বি পি এফ প্ৰথম স্থানত থকাৰ কাৰণো বাখ্যা কৰে।
“অসমত বড়োসকলৰ ভোটাৰ মাত্ৰ ১২-১৩ লাখ আছে। আহোমসকলৰ ৬০ লাখৰো অধিক আছে, কলিতাসকলৰ ৬০ লাখৰো ওপৰত আৰু চাহ জনগোষ্ঠীসকলৰো ৬০ লাখৰ ওপৰত আছে।”, সংখ্যাত তাকৰ বড়োসকলে ৰাজ্যৰ ৰাজনীতিত অত্যধিক গুৰুত্ব পাই থকাৰ প্ৰসংগত শৰণীয়াই কয়।
অন্য জনগোষ্ঠীৰ তুলনাত বড়োসকলৰ সংখ্যা কম হোৱাৰ পাছতো ৰাজ্যৰ ৰাজনৈতিক ক্ষেত্ৰখনত অন্যৰ তুলনাত অধিক সুযোগ লাভ কৰা বুলি তেওঁ মন্তব্য কৰে।
“মাত্ৰ ১২ লাখ ভোটাৰ থকা জাতি এটাই ১২ জনকৈ বিধায়ক, ৫ টাকৈ কেবিনেট, নিগম নিকায়ৰ অধ্যক্ষ পদ লৈ আছে। ইয়াৰ পৰা তেওঁলোক সাময়িকভাৱে লাভালাভ হ’লেও ভৱিষ্যতে হতাশাত ভুগিব।” অবড়োসকলৰ প্ৰতিনিধি হিচাপে নিৰ্বাচনত জয়ী হোৱা শৰণীয়াই কয়।
ইপিনে, ছয় জনগোষ্ঠীক জনজাতিকৰণৰ বিষয়ত চৰকাৰে কৌশলী স্থিতি গ্ৰহণ কৰিছে বুলি দাবী কৰি শৰণীয়াই কয়, ‘লোকসভাৰ নিৰ্বাচনৰ পূৰ্বে জনজাতিকৰণ হোৱাৰ কোনো সম্ভাৱনা নাই।”
শৰণীয়াই আমাৰ সাংবাদিকক জনোৱা অনুসৰি নাগৰিকত্ব সংশোধনী বিধেয়কৰ বিৰোধিতাৰ পৰা অসমৰ জনসাধাৰণৰ মনটো আঁতৰাই আনিবৰ বাবেহে নিৰ্বাচনৰ পূৰ্বে ৬ জনগোষ্ঠীক জনজাতিকৰণৰ চেষ্টা চলাইছে।
“নাগৰিকত্ব সংশোধনী বিধেয়কৰ ইচ্ছ্যুটো নাইকিয়া কৰিবৰ বাবে জনজাতিকৰণৰ প্ৰসংগটো উত্থাপন কৰা হৈছে যাতে সকলো জাতি-জনগোষ্ঠীৰ মাজত মাজত বিভাজন আহি সামগ্ৰিক শক্তি হ্ৰাস পায়।” শৰণীয়াই এইদৰে কয়।
তদুপৰি তেওঁ অসমৰ পূৰণি ইতিহাস ঘূৰি নহাটোৱে কামনা কৰা বুলি কয় যদিও পুৰণি ইতিহাস ঘূৰাই অনাৰ ক্ষেত্ৰত বিজেপি চৰকাৰে কটা ঘাঁত নিমখ ছটিয়াইছে বুলিও তেওঁ মন্তব্য কৰে।
তাৎপৰ্য্যপূৰ্ণভাৱে বিপিএফে সোণোৱাল চৰকাৰক চলোৱা বুলি সদৰী কৰাৰ লগতে হাগ্ৰামাই এতিয়া সোণোৱাল চৰকাৰৰ চালিকা শক্তি বুলিও আওপকীয়াকৈ শৰণীয়াই উল্লেখ কৰে।
তেওঁৰ মতে “অসমৰ ৰাজনৈতিক ক্ষেত্ৰখনত হাগ্ৰামাৰ এনে স্থিতি শুভ লক্ষণ নহয়। বিপিএফে বড়োলেণ্ড বিচাৰে আৰু কেৱল বড়ো লোকৰ উন্নয়নৰ কথা চিন্তা কৰে।”
আনহাতে বিপিএফ দলটোৰ নাগৰিকত্ব সংশোধনী বিধেয়কলৈ সমৰ্থনত আছে বুলি দাবী কৰে শৰণীয়াই। “কিয়নো বি পি এফ সুযোগ সন্ধানী দল বুলি ইতিমধ্যে হাগ্ৰামাই নিজ মুখেৰেই কৈছে।” নিজৰ দাবীৰ সপক্ষে শৰণীয়াৰ যুক্তি।
আনহাতে, বি টি এ ডিত অবড়োসকল চৰকাৰী সা-সুবিধাৰ পৰা বঞ্চিত হৈ আহিছে বুলি দাবী কৰি শৰণীয়াই কয় যে বি টি এ ডিত কেৱল বড়োসকলেহে চাকৰি বা অন্যান্য চৰকাৰী সুবিধাসমূহ লাভ কৰি আহিছে।
তেওঁ লগতে কয়, “আনকি কেৰাণী, মহৰী বা চৰকাৰী বিষয়াৰ পদতো দুৰ্নীতিৰে নিযুক্তি দিয়া বুলি অভিযোগ আছে”
ইপিনে, কিছুদিন পূৰ্বে অখিল গগৈ পাগল আখ্যা দিয়াক লৈও সৰব হৈ পৰে কোকৰাঝাৰৰ সাংসদগৰাকী।
“অখিল গগৈৰ প্ৰতিবাদী সত্তা আছে। তেওঁৰ খং আৰু আবেগ বেছি হ’লেও তেওঁৰ প্ৰতিবাদী সত্তাৰ কথা কোনেও অস্বীকাৰ নকৰে। ৰাজপথত নামিয়েই যিহেতু সকলো দিচপুৰ আহি ৰজা হৈছে। ৰজাসকল প্ৰজা হ’ব বেছি সময় নালাগে।” এইদৰে কৃষক নেতা অখিলৰ সমৰ্থনত মন্তব্য কৰে শৰণীয়াই।
