পঞ্চায়ত নিৰ্বাচনৰ দিন চমু চাপি অহাৰ লগে লগে ৰাজ্যৰ প্ৰায়বোৰ ৰাজনৈতিক দলে নিজৰ নিজৰ প্ৰস্তুতি চলোৱা পৰিলক্ষিত হৈছে। ঠিক সেইদৰে বৰপেটা জিলাৰ ভৱানীপুৰ বিধান সভা সমষ্টিতো ৰাজনৈতিক দলৰ শিৱিৰে শিৱিৰে চলিছে পঞ্চায়ত নিৰ্বাচনৰ তৎপৰতা।
সমষ্টিটোত দলীয় কৰ্মী সমৰ্থক সকল সম্প্ৰতি প্ৰাৰ্থী নিৰ্বাচনৰ লগতে ৰণ কৌশল প্ৰস্তুত কৰাত ব্যস্ত হৈ পৰিছে। ইতিমধ্যে এই সমষ্টিটোৰ বাবে এ আই য়ু ডি এফ, অগপ, বিজেপিৰ লগতে বি পি এফ দলে নিজাববীয়াকৈ প্ৰাৰ্থী নিৰ্বাচন প্ৰক্ৰিয়া আৰম্ভ কৰিছে ৷
উল্লেখ্যযে ৪১নং ভৱানীপুৰ বিধান সভা সমষ্টিৰ কিছু এলেকা বি টি এ ডিত অন্তৰ্ভক্ত হোৱাৰ বাবে মাত্ৰ ১২টা গাঁও পঞ্চায়ত, ১২ আঞ্চলিক পঞ্চায়ত, ২টা জিলা পৰিষদ আৰু ১৩১টা খণ্ড সদস্য পদৰ বাবেহে সমষ্টিটোত পঞ্চায়ত নিৰ্বাচন অনুষ্ঠিত হ’ব।
এই সন্দৰ্ভত বৰপেটা জিলা বি পি এফ কমিটিৰ সাধাৰণ সম্পাদক শৰৎ স্বৰ্গীয়াৰীয়ে জানিবলৈ দি কয় যে বি পি এফে আগন্তুক পঞ্চায়ত নিৰ্বাচনত ভৱানীপুৰ সমষ্টিৰ দুখন পঞ্চায়তত নিজাববীয়াকৈ প্ৰাৰ্থী থিয় কৰোৱাব আৰু বাকীবোৰ আসনত অগপ আৰু বিজেপি দলৰ সৈতে বুজা বুজি কৰি নিৰ্বাচনত অৱতীৰ্ণ হ’ব।
অৱশ্যে বি পি এফে কোন কোন আসনত কোন দলক সমৰ্থন আগবঢ়াব সেই কথা এতিয়াও জানিবলৈ দিয়া নাই যদিও পৰৱৰ্তী সময়ত এই কথা স্পষ্ট হ’ব বুলি জিলাখনৰ সাধাৰণ সম্পাদকগৰাকীয়ে জানিবলৈ দিয়ে।
