বিধান সভা নিৰ্বাচনলৈ মাজত মাত্ৰ কেইটামান মাহ বাকী । এনে পৰিস্থিতিত এতিয়া প্ৰাসংগিক হৈ পৰিছে বিটিচি নিৰ্বাচন । ইতিমধ্যে বিটিচি নিৰ্বাচনক লৈ শেহতীয়াকৈ উত্তাল হৈ পৰিছে বড়ো ভূমিৰ ৰাজনীতি ।
অসমৰ ৰাজনীতিত এদিন যি দৰে অগপৰ বিপৰ্যয় আৰম্ভ হৈছিল এতিয়া যেন সেই একেই প্ৰক্ৰিয়া আৰম্ভ হবলৈ ধৰিছে বড়োভূমিত । একমাত্ৰ নিজৰ ৰাজনৈতিক লাভালাভৰ বাবে প্ৰতিটো নিৰ্বাচনত ৰং সলোৱা হাগ্ৰামা মহিলাৰীৰ মুখৰ ৰং এইবাৰ যেন ক্ৰমান্বয়ে ম্লান পৰিবলৈ ধৰিছে ।
নিজকে কিং মেকাৰ বুলি আত্মসন্তষ্টি লভা হাগ্ৰামাৰ বৰঘৰত এইবাৰ প্ৰৱেশ কৰিলে বিজেপিয়ে । হাগ্ৰামাই হয়তো সপোনটো ভবা নাছিল যে বিজেপি ৰ লগত মিত্ৰতাৰে একেলগে চৰকাৰ গঠনৰ অংশীদাৰ হোৱাৰ পাছত এনে পৰিস্থিতিৰ উদ্ভৱ হব বুলি ।
তেও হয়তো ভাবি আছিল আসন্ন অসম বিধান সভা নিৰ্বাচনৰ প্ৰতি লক্ষ্য ৰাখি বিজেপিয়ে পুনৰ হাগ্ৰামাকেই বিটিচিত চৰকাৰ গঠন কৰাৰ বাবে সুবিধা দিব ।
কিন্তু সেয়া হৈ নুঠিল । কাৰণ দীঘলীয়া সময় ধৰি বিটিছি ৰ অনাবড়ো জনসাধাৰণৰ ওপৰত একপ্ৰকাৰ চাপ সৃষ্টি কৰি আহিছিল হাগ্ৰামাৰ নেতৃত্বত চলি থকা বিটিছি চৰকাৰ খনে । এইবাৰো যদি পুনৰ বিটিছিত হাগ্ৰামাই বিজেপিৰ সহযোগত বিটিছি দখল কৰে তেতিয়া দীৰ্ঘ দিনৰে পৰা শোষণৰ বলি হোৱা বিটিছি এলেকাৰ অনা বড়ো জনসাধাৰণে বিজেপিক সহজ ভাৱে নলব ।
যাৰ প্ৰভাৱ আসন্ন বিধান সভা নিৰ্বাচনত বিজেপি দলত পৰিব । সেয়ে বিজেপিয়ে হাগ্ৰামাক নিয়ন্ত্ৰণৰ ভিতৰত ৰাখি বিটিছিত অনাবড়ো সকলৰ স্বাৰ্থ সুৰক্ষিত কৰি ৰখাৰ লগতে ভৱিষ্যতে হাগ্ৰামাৰ পৰা আহিব সাম্ভাব্য ৰাজনৈতিক চাপৰ পৰা বিজেপি দলো যাতে সুৰক্ষিত হৈ থকিব পাৰে তাৰ এক ৰণকৌশল প্ৰস্তুত কৰে ভাৰতীয় জনতা পাৰ্টীয়ে ।
বিগত দীঘলীয়া সময়খিনিত হাগ্ৰামা নেতৃত্বাধীন বিপিএফ চৰকাৰ খনে বিটিছি এলেকা উন্নয়নৰ বাবে যিমানবোৰ সুবিধা কেন্দ্ৰ অথবা ৰাজ্য চৰকাৰ খনৰ পৰা লাভ কৰিছিল সেই সুবিধাৰে বড়োভূমিত যি উন্নয়ন হব লাগিছিল সেয়া নহল । বিশেষকৈ অনাবড়ো অঞ্চল সমূহৰ উন্নয়ন বৰ সিমিত আছিল । কেৱলমাত্ৰ নিৰ্বাচনৰ সময়ত অনাবড়ো সকললৈ মনত পৰা একাংশ বড়ো নেতৃত্বই একমাত্ৰ ভোটবেংক হিচাপে ব্যৱহাৰৰ কৰি আহিছে অনাবড়ো সকলক ।
বহু সময়ত ভয় ভাবুকিৰে এই সকল লোকক দমন কৰি ৰখাৰ প্ৰয়াস কৰিছিল বিটিছিত । তাৰ স্থানীয় জনসাধাৰণ বুলিয়েই তাত চাকৰি সুত্ৰে যোৱা অনাবড়ো চাকৰিয়াল সকলকো দুৰ্নীতি অনিয়মৰ বাবে বাধ্য কৰাইছিল হাগ্ৰামা নেতৃত্বাধীন বিটিছি চৰকাৰ খনে । বিগত দিন বোৰত ব্যাপক চৰকাৰী ধনৰ অপচয় আৰু আত্মসাত হল বিটিছিত । একাংশ ৰাজনৈতিক নেতা তথা দালাল ,ঠিকাদাৰৰ বাহিৰে সৰ্বসাধাৰণ জনতাৰ জীৱনৰ মানদণ্ডৰ একো পৰিৱৰ্তন নহল ।
যাৰ বাবে অনাবড়ো বুলিয়েই নহয় একাংশ বড়ো জনসাধাৰণৰো মোহভংগ হৈছে এতিয়া বিপিপিএফৰ প্ৰতি । ২০০৩ চনৰে পৰা একৰাহে বিটিছিৰ শাসনত অধিষ্ঠিত হৈ থকা হাগ্ৰামা মহিলাৰী নেতৃত্বাধীন বিপিপিএফক উৎক্ষাত কৰাৰ বাবে নৱ কুমাৰ শৰণীয়া লগত বিজেপি দলেও যুদ্ধ ক্ষেত্ৰত নামি পৰিছে । বিটিচিত বড়ো জনসাধাৰণৰ তুলনাত অনাবড়ো জনসাধাৰণৰ সংখ্যা বেছি ।
ইতিমধ্যে একাংশ বড়ো নেতাই বিপিপিএফৰ পৰা আতৰি আহি বিজেপি ত যোগদানৰ প্ৰক্ৰিয়া আৰম্ভ কৰিছে । বড়োভূমিত বহুধা বিভক্ত বড়ো ৰাজনীতিৰ তুলনাত এতিয়া ঐক্যবদ্ধ অনাবড়ো ৰাজনীতিৰ শক্তি যঠেষ্ট বেছি । মুছলমান ভোটাৰ সকলক বাদ দিলেও বিটিছিত আন অনাবড়ো ভোটাৰ সকলৰ লগতে একাংশ বড়ো ভোটাৰে ইতিমধ্যেই বিজেপি দলৰ প্ৰতি আস্থা প্ৰকাশ কৰি বিটিছি নিৰ্বাচনৰ নিৰ্বাচনী প্ৰচাৰত নামি পৰিছে । শেহতীয়াকৈ বিটিচিত ড° হিমন্ত বিশ্ব শৰ্মাৰ নিৰ্বাচনী সভাত ইয়াৰ বহি:প্ৰকাশ ঘটিছে ।
ইয়াৰ উপৰিও বিটিছি নিৰ্বাচনৰ পূৰ্বে বিপিএফত মোক্ষম আঘাট হানি হাগ্ৰামাৰ সংগ এৰিলে বিপিপিএফৰ কাৰ্যকৰী সভাপতি বিশ্বজিৎ দৈমাৰীয়ে সহ আন একাধিক বিপিপিএফ কৰ্মীয়ে । এনেকৈয়ে এদিন অসমৰ প্ৰধান আঞ্চলিক দল অগপ ধ্বংস দিশেৰে গতি কৰিছিল ।
একমাত্ৰ অহংকাৰ আৰু সঘনাই নিজৰ ৰূপ সলোৱা স্বভাৱৰ বাবেই হাগ্ৰামাৰ বিপিপিএফক এতিয়া কোনো ৰাজনৈতিক দলেই বিশ্বাসত লব নোৱাৰা অৱস্থা এটা আহি পৰিছে । ইয়াৰ উপৰিও হাগ্ৰামাৰ একনায়কত্ববাদী কৰ্মৰাজিৰ বাবেও বিপিপিএফৰ বহু শীৰ্ষ দলীয় কৰ্মী অসন্তুষ্ট হৈ পৰিছে দলটোৰ প্ৰতি ।
দীৰ্ঘ দিন ধৰি আনক চাপত ৰখা হাগ্ৰামাই এতিয়া নিজেই যে ভয়ংকৰ চাপত সময় পাৰ কৰিব লগা হৈছে সেয়া নিশ্চিত । ভৱিষ্যতে হাগ্ৰামাই পুনৰ বিটিছিত শাসন কৰাৰ সুবিধা পালেও সেয়া হয়টো সম্ভৱ অন্য দলৰ সহযোগিতাতহে ।
সেয়ে আসন্ন অসম বিধান সভা নিৰ্বাচনৰ প্ৰাক মুহূৰ্তত বিজেপি দলে অতি সময়োপযোগী সিধান্তৰে একাংশ বড়ো নেতৃত্বতক নিজৰ ফলিয়া কৰি লৈ হাগ্ৰামাক এশিকনী দিয়াৰ প্ৰস্তুতি আৰম্ভ কৰিলে ।
সময় আৰু পৰিস্থিতিয়ে সম্পূৰ্ণ ভাৱে লগ দিলে বিজেপিক । হাগ্ৰামাই নিজেই কবলৈ বাধ্য হৈছে বিটিছিত তেওঁলোকৰ বাবে মুল প্ৰত্যাহ্বান এতিয়া আন কোনো নহয় , বিজেপিহে ।
