লকডাউনৰ সময়তে দেশত এনে কিছুমান আজৱ ঘটনা পোহৰলৈ আহিছে য’ত কিছু লোকে আৰক্ষীৰ চকুত ধূলি মাৰি নিজৰ ইপ্সিত কাম সমাপন কৰিছে।
উত্তৰ প্ৰদেশৰ মুজাফ্ফৰনগৰত এনে এক ঘটনা সংঘটিত হৈছে। ইয়াৰে খতৌলি সমষ্টিৰ এজন যুৱকে বিয়াৰ বাবে নিজকে ৰোগী সাজিলে আৰু এম্বুলেন্স লৈ গৈ গাজিয়াবাদৰ শ্বহীদনগৰৰ পৰা কইনা লৈ আহিল।
আৰক্ষীয়ে জানিবলৈ দিয়ে যে কিছুদিন পূৰ্বে খতৌলি কস্বেৰ ইছলামনগৰ গলিত বাস কৰা এজন যুৱক আহমেদে পিতৃ ইছৰাৰ সৈতে এজন চিনাকি এম্বুলেন্সৰ চালক মেহবুবৰ লগত ৰোগী সাজি গাজিয়াবাদৰ শ্বহীদনগৰ অঞ্চলত বিয়া কৰাবলৈ যায়।
তাত বিয়া পাতি কইনাক নিজৰ ঘৰলৈকো লৈ আনে। যুৱকজন যিটো এলেকাত থাকে সেই স্থানটো কোনো লোক কৰ’না পজিটিভ ওলোৱাৰ বাবে জিলা প্ৰশাসনে আগৰে পৰা ছীল কৰি ৰাখিছিল।
বিয়াৰ কথা পোহৰলৈ অহাৰ পাছত জিলা প্ৰশাসনে আহমেদ আৰু তেওঁৰ পত্নীক কোৱাৰেন্টাইন কৰি দিয়ে।
ঘটনাটোৱে প্ৰতিক্ৰিয়াৰ সৃষ্টি কৰাৰ পাছতে আৰক্ষীয়ে এম্বুলেন্সৰ চালক মেহবুব, আহমেদ আৰু তেওঁৰ পিতৃ হাজী ইছৰাৰৰ ওপৰত ভাৰতীয় দণ্ডবিধিৰ ধাৰা ১৮৮ৰ অধীনত এটা গোচৰ ৰুজু কৰে।
ইপিনে, সাহিবাবাদত আন এটি আমোদজনক ঘটনা সংঘটিত হৈছে। ইয়াত লকডাউনৰ সময়ত এজন যুৱকক পাচলি তথা দোকানৰ সামগ্ৰী আনিবলৈ বাহিৰলৈ ওলাই যায়, কিন্তু উভতি অহাৰ সময়ত লগত কইনা এজনীও লৈ আহে।
লকডাউনত হঠাতে কইনা আনি ঘৰ সোমোৱাত যুৱকজনৰ মাতৃৰ তত হেৰুওৱা অৱস্থা। প্ৰকৃততে, যুৱকজনে নিজৰ প্ৰেমিকাক পত্নী সজাই ঘৰলৈ লৈ আনিছিল।যুৱকজনৰ অসন্তুষ্ট মাতৃয়ে কইনাক ঘৰ সোমোৱাবলৈ নিদিয়াত বিষয়টো গৈ থানাৰ মজিয়া পালে।
