ব্ৰিটিছ নাৰ্ছ লুচি লেটবিয়ে ২০১৫ চনৰ পৰা ২০১৬ চনলৈ এবছৰত ৭টা নৱজাতক শিশুক হত্যা কৰাৰ লগতে আৰু ছটা শিশুক হত্যা কৰাৰ চেষ্টা চলাইছিল। যোৱা কেইমাহমানৰ পৰা তেওঁৰ ‘কাণ্ড’ৰ কথা শুনি সমগ্ৰ বিশ্বৰ জনসাধাৰণে স্তম্ভিত হৈ পৰিছে। তেওঁক আধুনিক ইউৰোপীয় ইতিহাসৰ আটাইতকৈ বিপজ্জনক চাইল্ড ছিৰিয়েল কিলাৰ বুলি কোৱা হৈছে।
সোমবাৰে (২১ আগষ্ট) তেওঁক অকালতে জন্ম হোৱা আৰু অসুস্থ নৱজাতকক হত্যা কৰাৰ অপৰাধত দোষী সাব্যস্ত কৰা হয়। ইয়াৰ উপৰিও শিশুসকলৰ পিতৃ-মাতৃৰ দুৰ্বলতাৰ সুযোগ লোৱাৰ দোষতো তেওঁক দোষী সাব্যস্ত কৰা হৈছে। মানচেষ্টাৰৰ ক্রাউন আদালতে তেওঁক যাৱজ্জীৱন কাৰাদণ্ডৰ শাস্তি প্ৰদান কৰে।
লগতে পঢ়ক: হাস্পাতালৰ নাইট ডিউটিত হত্যা কৰিছিল ৭টা নৱজাতকক; আদালতত দোষী সাব্যস্ত নাৰ্ছ
শাস্তি প্ৰদান কৰি মানচেষ্টাৰ ক্রাউন ক’ৰ্টৰ ন্যায়াধীশগৰাকীয়ে কয় যে লুচি লেটবিয়ে এই আক্ৰমণসমূহ আকস্মিকভাৱে সংঘটিত কৰা নাছিল। যথেষ্ট পৰিকল্পিতভাৱে, হিচাপ-নিকাচ কৰি আৰু চৰম ধূৰ্ততাৰে তেওঁ নৱজাতকক হত্যা কৰিছিল বা হত্যা কৰাৰ চেষ্টা কৰিছিল। ন্যায়াধীশগৰাকীয়ে কয় যে তেওঁৰ আচৰণৰ নিষ্ঠুৰতা অত্যন্ত ভয়ংকৰ।
অৱশেষত ৩৩ বছৰীয়া লুচি লেটবিক পাঁচজন শিশু পুত্ৰ আৰু দুগৰাকী শিশু কন্যাক হত্যা কৰাৰ অপৰাধত দোষী সাব্যস্ত কৰা হয়। প্ৰতিটো কাণ্ড সংঘটিত হৈছিল ২০১৫ চনৰ জুন মাহৰ পৰা ২০১৬ চনৰ জুন মাহৰ ভিতৰত, ইংলেণ্ডৰ কাউণ্টেছ অৱ চেষ্টাৰ হাস্পতালত।
অৱশ্যে তদন্তকাৰীয়ে সন্দেহ কৰিছে যে আৰু কেইবাটাও নৱজাতক ভুক্তভোগী হ’ব পাৰে। কাৰণ লুচিয়ে ২০১০ চনৰ পৰা সেই চিকিৎসালয়খনত কাম কৰিছিল।
লগতে পঢ়ক:আত্মসমৰ্পণৰ কথা ঘোষণা কৰিলে আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পে
লুচিয়ে আৰম্ভণিৰে পৰাই তেওঁৰ বিৰুদ্ধে উত্থাপিত সকলো অভিযোগ অস্বীকাৰ কৰিছিল। অৱশ্যে তেওঁৰ ঘৰত তালাচী চলাওঁতে ব্ৰিটিছ আৰক্ষীয়ে কেইবাটাও টোকা উদ্ধাৰ কৰে। এই টোকাবোৰেই শেষত তেওঁক দোষী সাব্যস্ত কৰাত সহায় কৰিছিল। এটা টোকাত লিখা আছিল, “মই বৰ বেয়া, মই এই কাম কৰিলোঁ।” এটা টোকাত লিখা আছিল “মই জীয়াই থকাৰ যোগ্য নহয়। মই ইচ্ছাকৃতভাৱে সিহঁতক মাৰি পেলালোঁ। মই সিহঁতৰ যত্ন ল’বলৈ উপযুক্ত নহয়।”
যদিও এই টোকাবোৰে লুচি লেটবিক দোষী সাব্যস্ত কৰাত সহায় কৰিছিল, তথাপিও তেওঁ কিয় এই হত্যাকাণ্ড সংঘটিত কৰিছিল সেয়া জনা নাযায়। ইটোৰ পিছত সিটোকৈ নিৰীহ নৱজাতকক হত্যা কৰাৰ আঁৰত তেওঁৰ কি উদ্দেশ্য আছিল, সেয়া ৰায়দানৰ পিছতো স্পষ্ট নহয়। সংশ্লিষ্ট সকলোৱে এই প্ৰশ্নটোকলৈ উদ্বিগ্ন।
মনোবিজ্ঞানীসকলৰ মতে লুচি লেটবিয়ে ‘ঈশ্বৰ’ হ’ব বিচাৰিছিল। সেইবাবেই তেওঁ সেই ল’ৰা-ছোৱালীবোৰক আক্ৰমণ কৰিছিল। তাৰ পিছত তেওঁ সহকৰ্মীসকলক আগতীয়াকৈ সকীয়াই দিছিল যে শিশুসকলৰ স্বাস্থ্যৰ অৱনতি ঘটিব পাৰে। কি হ’ব পাৰে তেওঁ ইতিমধ্যে গম পাইছিল। সকলো তেওঁৰ নিয়ন্ত্ৰণত আছিল। আৰু এই ক্ষমতা তেওঁ উপভোগ কৰিছিল। তেওঁ জনা কথাবোৰ ভৱিষ্যদ্বাণী কৰি নিজকে ঈশ্বৰ বুলি ভাবিবলৈ আৰম্ভ কৰিছিল।
লগতে পঢ়ক:বিশ্ব দবা চেম্পিয়নশ্বিপৰ ফাইনেলত প্ৰজ্ঞানন্দ; অসাধাৰণ প্ৰদৰ্শন দেখি মুগ্ধ বিশ্বনাথন আনন্দ
কিছুমানৰ মতে মনোযোগ আৰু সহানুভূতি আকৰ্ষণ কৰাটোৱেই আছিল লুচি লেটবিৰ প্ৰকৃত উদ্দেশ্য। অধ্যাপক ইয়ৰ্কাৰে যিসকলক হত্যাৰ দৰে অপৰাধত দোষী সাব্যস্ত কৰা হৈছিল কেৱল সেইসকল চিকিৎসক, নাৰ্ছ বা স্বাস্থ্যকৰ্মীকলৈয়েই অধ্যয়ন কৰে। তেওঁ এনে ১৩০টাতকৈও অধিক গোচৰৰ তদন্ত কৰিছে। তেওঁৰ মতে এনে হত্যাকাণ্ডত হত্যাকাৰীয়ে এক অদ্ভুত ক্ষমতা অনুভৱ কৰে। প্ৰাণ লোৱাৰ ক্ষমতাৰ তৃপ্তি ল’বলৈকে তেওঁলোকে বাৰে বাৰে এক ঘটনা ঘটাই থাকে।
