মহামাৰী ক’ৰ’না ভাইৰাছৰ কাৰণে দ্বিতীয় বিশ্ব যুদ্ধৰ পিছত প্ৰথমবাৰৰ বাবে স্থগিত কৰিব লগীয়া হ’ল ব্ৰিটিছ অ’পেন গ’ল্ফ।
১৪৯ সংখ্যক অ!পেন জুলাই মাহত কেণ্টৰ ৰয়েল ছেণ্ট জৰ্জ গ’ল্ফ ক্লাবত অনুষ্ঠিত হোৱাৰ কথা আছিল। গ’ল্ফৰ এই সবাটোকৈ পুৰণি মেজৰ এতিয়া অহা বছৰ জুলাই মাহত অনুষ্ঠিত হ’ব।
আয়োজকে এই কথা জানিবলৈ দি কয়, ‘এই টুৰ্ণামেণ্টখন ১২ৰ পৰা ১৯ জুলাইলৈকে কেণ্টত অনুষ্ঠিত হোৱাৰ কথা আছিল। কোভিদ-১৯ৰ সংহাৰী ৰূপৰ বাবে ব্ৰিটিছ চৰকাৰ, স্বাস্থ্য অধিকাৰী আৰু আৰ এণ্ড এ(দ্যা ৰয়েল এণ্ড এনচিয়েণ্ট গ’ল্ফ ক্লাব অফ চেইণ্ট এন্দ্ৰিউজ)ৰ প্ৰতিনিধিৰে আলোচনাৰ অন্তত চেম্পিয়নশ্বিপখন স্থগিত ৰখা হয়’।
এই প্ৰতিযোগিতাখনৰ উপৰি আন তিনিখন গ’ল্ফ টুৰ্ণামেণ্টৰো সময়সূচীৰ ব্যাপক সালসলনি ঘটোৱা হৈছে। মাষ্টাৰ্চ অ’পেন এপ্ৰিলৰ পৰিৱৰ্তে নৱেম্বৰত, য়ু এছ পি জি এ আগষ্টত আৰু য়ু এছ অ’পেন ছেপ্তেম্বৰত ৰাইডাৰ কাপৰ ঠিক এসপ্তাহ পূৰ্বে অনুষ্ঠিত হ’ব।
উল্লেখ্য যে এই মহামাৰী ভাইৰাছবিধে সমগ্ৰ বিশ্বতে ভয়াবহ ৰূপ ধাৰণ কৰিছে আৰু যাৰ বাবে বিশ্বৰ আগশাৰীৰ স্প’ৰ্টছ টুৰ্ণামেণ্ট সমূহ সাময়িকভাৱে স্থগিত ৰাখিছে।
যোৱা সপ্তাহত উইম্বলডন স্থগিত ৰখাৰ সিদ্ধান্ত লোৱাৰ লগতে ২০২০ অলিম্পিক এবছৰ পিছুৱাই ২০২১ চনত অনুষ্ঠিত কৰাৰ সিদ্ধান্ত লয়।
আনহাতে ভাৰতত সৰ্বাধিক জনপ্ৰিয় ক্ৰিকেট লীগ আই পি এলো ক’ৰ’না ভাইৰাছৰ বাবে সাময়িকভাৱে স্থগিত ৰখা হৈছে।
