৭২ সংখ্যক স্বাধীনতা দিৱস উপলক্ষে ভাৰত-বাংলাদেশৰ সুৰক্ষা বাহিনীৰ মাজত সদ্ভাৱণা বজাই ৰখাৰ উদ্দেশ্যে আগৰতলা-আখৌৰাস্থিত ভাৰত-বাংলা সীমান্তত বি এছ এফৰ এটা দলে বাংলাদেশৰ সুৰক্ষা কৰ্মীৰ মাজত মিঠাই বিতৰণ কৰি প্ৰাক স্বাধীনতা দিৱস উদযাপন কৰা দেখা যায়।
বি এছ এফৰ ১২০ নং বেটেলিয়নৰ দলে ব’ৰ্ডাৰ গাৰ্ড বাংলাদেশ(বি ডি বি)ৰ ২৫ নং বেটেলিয়নৰ গোটটোক মিঠাইৰ টোপোলা বিতৰণ কৰে। সীমান্ত অঞ্চলত এনেদৰে মিঠাই বিতৰণ কাৰ্যসূচী বহু বছৰৰে পৰা চলি থকা বুলি জানিবলৈ দিয়ে।
বি ডি বিৰ চুবেদাৰ মোকতাৰে কয়, ‘এই পদক্ষেপৰ জৰিয়তে দুয়োখন দেশৰ মাজত বন্ধুত্বসুলভ মনোভাৱ আৰু বৃদ্ধি পাব। ১৯৪৭ চনৰ ১৫ আগষ্টত ভাৰতবৰ্ষই লাভ কৰিছিল স্বাধীনতা। সেয়ে স্বাধীনতা দিৱসৰ প্ৰাকক্ষণত সমগ্ৰ ভাৰতবাসীকে বি ডি বিৰ হৈ মই শুভেচ্ছা প্ৰদান কৰিছো। বি এছ এফ আৰু বি ডি বিয়ে সীমান্তত এটা সুন্দৰ বন্ধুত্বসুলভ মনোভাৱ সৃষ্টি কৰি নিজৰ নিজৰ দায়িত্ব নিয়াৰিকৈ পালন কৰি আছো আৰু আগলৈও কৰি যাবলৈ যত্ন কৰিম’।
তেওঁ আৰু কয়. ‘১৯৭১ চনত যেতিয়া পাকিস্তানৰ পৰা বাংলাদেশ আঁতৰি আহিছিল তেতিয়া ভাৰতে আমাক যথেষ্ট সহায় কৰিছিল। ভাৰতৰ বহু সেনা, বি এছ এফ জোৱানে আমাৰ স্বাধীনতাৰ বাবে নিজৰ জীৱন উৎসৰ্গা কৰিছিল। পাকিস্তানৰ পৰা আমাক স্বাধীন কৰাত সহায় কৰা যি সকল জোৱান এতিয়াও জীৱিত অৱস্থাত আছে তেওঁলোকক সশ্ৰদ্ধা প্ৰণাম। লগতে বাংলাদেশৰ হৈ মই সেই বীৰ চহিদ জোৱানসকলকো জনাইছো একাঁজলি শ্ৰদ্ধাঞ্জলি’।
উল্লেখ্য যে সীমান্তৰ সুৰক্ষাৰ দায়িত্বত থকা দুয়োখন দেশৰে নিৰাপত্তা বাহিনীৰ এনে ধৰণৰ আদৰণীয় পদক্ষেপে দুয়োখন দেশৰ মাজত বন্ধুত্ব সুলভ মনোভাৱ বৃদ্ধি কৰাত যথেষ্ট সহায়ক হ’ব বুলি সীমান্তত বসবাস কৰা লোক সকলে ধাৰণা কৰিছে।
