পুলৱামা কাণ্ডৰ পাছৰে পৰা ভাৰত-পাকিস্তানৰ মাজত বৃদ্ধি হোৱা যুদ্ধ সদৃশ পৰিৱেশৰ প্ৰতি লক্ষ্য ৰাখি কেন্দ্ৰই ভাৰত-বাংলাদেশৰ আন্তঃৰাষ্ট্ৰীয় সীমান্তৰ সুৰক্ষাত নিয়োজিত বি এছ এফৰ জোৱানসকলক সতৰ্ক হৈ থাকিবলৈ নিৰ্দেশ জাৰি কৰিছে।
ভাৰত-বাংলাদেশৰ আন্তঃৰাষ্ট্ৰীয় সীমান্তৰে সন্ত্ৰাসবাদী পাৰ হৈ আহি ভাৰতক পুনৰ অস্থিৰ কৰি তুলিব পাৰে বুলি আশংকা প্ৰকাশ কৰিয়েই সীমান্ত সুৰক্ষা বাহিনীৰ উচ্চ পৰ্যায়ৰ বিষয়াই এই সতৰ্কতা জাৰি কৰিছে।
ইফালে এই সতৰ্কতা পোৱাৰ পিছৰে পৰা এতিয়া বি এছ এফে ভাৰত-বাংলা সীমান্তত সুৰক্ষাৰ গতি-বিধি তীব্ৰতৰ কৰি তুলিছে।
উল্লেখ্য যে পশ্চিম বংগৰ লগতে উত্তৰ-পূবৰ বহু কেইখন ৰাজ্য ক্ৰমে অসম, মেঘালয়, মিজোৰাম আৰু ত্ৰিপুৰাৰ অধিকতম অঞ্চলৰ সৈতে বাংলাদেশ সীমান্ত সংলগ্ন হৈ আছে। ইয়াৰে বেছিভাগ অঞ্চলত এতিয়াও ফেন্সিঙ নাই।
ইয়াৰ সুযোগ লৈ সন্ত্ৰাসবাদী সংগঠনসমূহে ভাৰতত অপ্ৰীতিকৰ পৰিস্থিতিৰ সৃষ্টি কৰিব পাৰে বুলি সন্দেহ প্ৰকাশ কৰিয়েই সীমান্তত নিয়োজিত নিৰাপত্তা বাহিনীক সতৰ্ক কৰি দিছে। ইয়াৰ উপৰি ভাৰত-বাংলাৰ নৈ পৰীয়া সীমান্ত অঞ্চলতো পহৰা বৃদ্ধি কৰা হৈছে।
উল্লেখযোগ্য যে ১৪ ফেব্ৰুৱাৰিত জম্মু কাশ্মীৰৰ পুলৱামাত পাকিস্তান সমৰ্থিত সন্ত্ৰাসবাদীয়ে সংঘটিত কৰা আত্মঘাটী বোমা বিস্ফোৰণত অসমৰ মনেশ্বৰ বসুমতাৰীৰ লগতে দেশৰ ৪০ গৰাকীকৈ চি আৰ পি এফ জোৱান চহিদ হৈছিল।
উক্ত আত্মঘাটী বিস্ফোৰণৰ প্ৰত্যুত্তৰত ভাৰতে বায়ু সেনাৰ জৰিয়তে যোৱা ২৬ ফেব্ৰুৱাৰিত পাক অধিকৃত কাশ্মীৰৰ বিভিন্ন সন্ত্ৰাসবাদী শিবিৰত আক্ৰমণ কৰে। উক্ত আক্ৰমণত প্ৰায় ৩০০ৰো অধিক সন্ত্ৰাসবাদী নিহত হোৱা বুলি বিভিন্ন মহলে দাবী কৰিছে।
ভাৰতীয় বায়ু সেনাই সন্ত্ৰাসবাদী শিবিৰত আক্ৰমণ কৰাৰ পিছৰে পৰা ভাৰত-পাকিস্তানৰ মাজত এতিয়া বিৰাজমান যুদ্ধ সদৃশ পৰিৱেশ।
