বি টি চিৰ পশুপালন বিভাগৰ ডায়েৰি উন্নয়নৰ এছ অ পি ডি(SOPD) আঁচনিৰ অধীনত বি টি চিৰ চাৰিখন জিলাত বিশুদ্ধ গাখীৰ উৎপাদনৰ লক্ষ্যৰে মুঠ ৮৬ গৰাকী হিতাধিকাৰীক দুগ্ধ সামগ্ৰী বিতৰণৰ বাবে বাছনি কৰিছিল। এই উপলক্ষে কোকৰাঝাৰ চহৰৰ তিতাগুৰীস্থিত বি টি চিৰ পশুপালন বিভাগৰ কাৰ্যালয়ত আজি আনুষ্ঠানিকভাৱে প্ৰথম পৰ্যায়ত চিৰাং জিলাৰ মুঠ ৫১ গৰাকী হিতাধিকাৰীৰ মাজত দুগ্ধ উৎপাদনৰ সামগ্ৰী বিতৰণ কৰে।
সামগ্ৰী বিতৰণী অনুষ্ঠানত বি টি চিৰ পশুপালন বিভাগৰ কাৰ্যবাহী সদস্য শ্যাম চুণ্ডীয়ে আনুষ্ঠানিকভাৱে হিতাধিকাৰী সকলৰ মাজত দুগ্ধ সামগ্ৰী সমূহ বিতৰণ কৰি গাখীৰ উৎপাদনকাৰী সকলক জনতাৰ সু-স্বাস্থ্যৰ বাবে বিশুদ্ধ গাখীৰ যোগান ধৰাৰ বাবে আহ্বান জনায়।
তেওঁ লগতে বি টি চিৰ পশুপালন বিভাগৰ ডায়েৰী উন্নয়নৰ এছ অ পি ডি আঁচনিৰ ২০১৮-১৯ বিত্তীয় বৰ্ষৰ বাবে ইতিমধ্যে চাৰিখন জিলাতে ৮৬ গৰাকী দুগ্ধ হিতাধিকাৰীক এই আঁচনিত সামৰি লোৱা বুলি সদৰি কৰে। এইক্ষেত্ৰত বি টি চিৰ কাৰ্যবাহী সদস্য শ্যাম চুণ্ডীয়ে বি টি চিত সম্প্ৰতি ডায়েৰি ফাৰ্মেৰে বহু নিৱনুৱা যুৱক-যুৱতী আত্মসংস্থাপন হোৱাৰ লগতে বি টি চিত দুগ্ধ উৎপাদন দ্ৰুত গতিত বৃদ্ধি হোৱা বুলিও দাবী কৰে।
উল্লেখ্য যে, আজিৰ অনুষ্ঠানত দুগ্ধ উৎপাদনকাৰী সকলক গাখীৰ যোগান ধৰাৰ বাবে ২০ লিটাৰ আৰু ৪০ লিটাৰৰ দুটাকৈ ড্ৰাম, গাখীৰৰ পৰা ক্ৰীম বনোৱা মেচিন, হিতাধিকাৰীৰ সুবিধাৰ্থে ৰেইন কোট, গাম বুট আৰু হেণ্ড গ্লোভ বিতৰণ কৰে।
অনুষ্ঠানত বি টি চিৰ ডায়েৰি উন্নয়ন বিষয়া জয়নাল হকে প্ৰথম পৰ্যায়ত চিৰাং জিলাক প্ৰাধান্য দিয়াৰ কথা উল্লেখ কৰি দূৰ্গোৎসৱৰ পিছতে দ্বিতীয় পৰ্যায়ত কোকৰাঝাৰ, বাকসা আৰু ওদালগুৰিৰ হিতাধিকাৰীসকলৰ মাজত দুগ্ধ উৎপাদন সামগ্ৰী বিতৰণ কৰা হ’ব বুলি সদৰী কৰে।
