চিৰাং জিলাত দীৰ্ঘদিন ধৰি সক্ৰিয় হৈ থকা বাৰ্মিজ চুপাৰি চিণ্ডিকেটৰ বিৰুদ্ধে তৎপৰ হৈ পৰিছে জিলাখনৰ আৰক্ষী ৷
এই তৎপৰতাৰ অংশ হিচাপে জিলাখনৰ বিজনীত চিৰাং আৰক্ষীয়ে বাৰ্মিজ চুপাৰিৰ আন্তৰ্জাতিক চোৰাং ব্যৱসায়ৰ সৈতে জড়িত ছিণ্ডিকেট চক্ৰৰ বিৰুদ্ধে অতৰ্কিতে অভিযান চলাই ৯ জনক আটক কৰে।
সেইদৰে আৰক্ষীয়ে একাধিক অবৈধ চুপাৰি মজুত ৰখা গুদামতো অভিযান চলায় ৷
আৰক্ষীয়ে এই অভিযানৰ জৰিয়তে প্ৰায় ১০ কোটি টকা বজাৰ মূল্যৰ চুপাৰিও জব্দ কৰে।
সেইদৰে গুদাম গৃহত ম্যানমাৰ আৰু বাংলাদেশত নিৰ্মিত কেইবাখনো মৰাপাটেৰে তৈয়াৰী বস্তাও জব্দ কৰে।
উল্লেখ্য দীৰ্ঘ সময় ধৰি জিলাখনৰ বিজনী অঞ্চলত সক্ৰিয় হৈ থকা বাৰ্মিজ চুপাৰিৰ আন্তৰ্জাতিক চোৰাং ব্যৱসায়ী চক্ৰই বিভিন্ন পক্ষক হাতৰ মুঠিত ৰাখি পোনে পোনে ম্যানমাৰৰ পৰা চুপাৰি আমদানি কৰি বিভিন্ন গুদামত মজুত কৰি আহিছে। পাছত ছেগবুজি বহিঃৰাজ্য আৰু ভাৰতৰ চুবুৰীয়া ৰাষ্ট্ৰ সমূহলৈ সেই চুপাৰী প্ৰেৰণ কৰাৰ অভিযোগ উত্থাপন হৈ আহিছে।
ইয়াৰ মাজতে চিৰাং জিলাৰ নৱ নিযুক্ত আৰক্ষী অধীক্ষক গৌৰৱ উপাধ্যায়ৰ নেতৃত্বত তথা অতিৰিক্ত আৰক্ষী অধীক্ষক প্ৰকাশ মেধি, উপ আৰক্ষী অধীক্ষক প্ৰতাপ দাস আৰু বিজনী মহকুমা আৰক্ষী বিষয়াৰ সহযোগত আৰক্ষীয়ে চাৰিটা অভিযানকাৰী গোটত বিভক্ত হৈ চলোৱা অভিযানত ছিণ্ডিকেট চক্ৰৰ মূল ব্যক্তি হিচাপে সন্দেহ কৰা কুৰবান আলীৰ লগতে আন ৮ জনক আটক কৰিবলৈ সক্ষম হয়।
পিছত আটক কৰা ৯ জনকে সোধ -পোছৰ বাবে বিজনী থানালৈ লৈ যায় ।
চিৰাং জিলা আৰক্ষীৰ বাবে এয়া এক বৃহৎ সফলতা হিচাপে পৰিগণিত হৈছে ৷
